Dawa buh speed limit ha ka 4lane

Nongpoh. 05 Iaiong:
Ka Hynniewtrep National Youth Front (HNYF) Northern Region, ka la pynpaw ia jingsngewkhia kaba jur halor ka jingbymdon jong ki Signboard kiban kdew shai ia ki nongniah kali ha shilynter jong u surok bah NH-40 naduh Jorabat haduh Umiam, ha kaba kane ka jingbymdon jong kitei ki signboard, kham tam ha ki jaka ba long Iew bad bun briew ka ju wanrah ruh ia ki jingjia ba sngewsih ba man ka por.
Katkum ka kyrwoh ba la phah da u president ka HNYF Northern Region, u Bah Markus Marten, u la ong ba ka seng ka buh ia ka jingdawa ia ka National Highway Authority India (NHAI) bad ia ka company IL&FS kaba pyntrei ia kane ka surok, ba ki dei ban buh noh mardor iaki Signboard Speed Limit bad kadaw kaba la pynlong ia ka seng ban dawa buh ia kitei ki Signboard, ha ki jaka ba long sor bad bun briew ka dei namar ka seng ka la lap ba bun na ki nongniah kali kim burom shuh iaki paidbah nongleit nongwan da kaba pynher sted iaki kali, da kaba shim kabu halor ka jingbymdon jong ki Signboard.
Hooid ym lah ban len ba kane ka jingwan jong ka surok 4-lane ha Ri Bhoi, ka la long kum ka jingkyrkhu kaba khraw ia ki paid nongleit nongwan, hynrei ha kawei pat ka liang ka long pat ka jingma iaki paidbah ba iaid ba ieng ha shi lynter jong u surok, namar ka jingbym don ki signboard kiba biang kiba kdew shai iaki Speed Limit, ba ki kali ki dei ban iaid suki, kum haki jaka ba long sor, ki Iew, ki skul bad kumta ter ter, la ong u Bah Marcus Marten.
Ka jingma kaba wanrah na ka jingbymdon jong ki Signboard ka dei na ki draibar kiba wan na ki jaka ba kham jngai bad kiba wan tengkhat, namar kine ki draibar na jngai kim tip ha kino ki jaka ba bun briew, ki jaka ba long Iew, ki skul bad kane ka lah ban wanrah iaka jingjia ba sngewsih na ka jingpynher sted jong ki ia ki kali kaba ki niah.
Ha kajuh ka por ka seng kala dawa ruh ban buh noh da ki Signboard kiba shai ha Weight Bridge kaba don ha Umling, namar ha katei ka jaka bun naki paidbah ki kulmar ia ka rukom iaid jong ki kali bad halor jong kane ka seng kala dawa naka NHAI bad kumjuh ruh ka kompani IL&FS ba kan shimkhia ban pynbiang noh ia ki signboard ha shilynter jong u surok 4-lane, khanag ba kan wanrah ia ka jingshngain na ka bynta jong ki paidbah nongleit nongwan.