Dawa biang U bah Jemino ban hiar shuki U Mukul Ka MPF, ka don ia ka number thaw Sorkar

Shillong, 23 Nailur:
U MLA jong ka United Democratic Party (UDP), bah Jemino Mawthoh u la ong, ki seng riewlum ki dap pura ia ka jingbun paid na ka bynta ban dawa hiar shuki ia u Myntri Rangbah Dr. Mukul Sangma.
U Bah Jemino u la ban jur biang ba u Dr. Mukul Sangma u dei ban hiar shuki noh bad ka liang synshar ka dei ban jied noh da uwei u Chief Minister u ban shah shkor ia ka jingud jingnam jong ki paidbah.
Halorka jingkam ba ki don ia ka number ha ka jingbun paid ban dawa hiar shuki ia u Myntri Rang bah, u bah Jemino u la ong ba ha ka ilekshon kaba la dep ki nongthep vote baroh ki don kumba 13,19,039, lak vote ka Congress ka la ioh 4,58,783 lak vote kaba long kumba 34.78% katba ki seng riewlum bad kiwei pat ki party ki ioh 8,60,256 lak vote kaba long kumba 65.22%, kumta ki don ia ka jingbun paid kaba biang pura na ka bynta ban dawa hiar shuki ia u Myntri Rangbah Dr. Mukul Sangma u la bynrap.
U bah Jemino Mawthoh u la kynthoh ia kane halor ka jingong jong u Myntri Rangbah ka jylla u Dr. Mukul Sangma hato ka MPF ka don ia ka number na ka bynta ban thaw sorkar. Halor ka jingkynthoh jong ka MPCC ba bah Mawthoh u dei ban tuklar ia ka seng Congress ha kaba iadei bad ka jingdawa ban hiar shuki bad dawa ba kin jied noh da uwei u nongialam, u bah Mawthoh u la ong na ka liang jongu ruh u lah ban tuklar namar u tuklar ia u Myntri Rangbah ym ia u Dr. Mukul Sangma shimet bad u ong ruh ba lada ym lah ban tuklar, kumno ka Congress ka kynthoh halor u Modi uba dei u kyrtong Prime Minister jong ka BJP.
U la ban biang ba u Dr. Mukul Sangma udei ban hiar shuki noh namar wat ia ka Garo Hills ruh um lah ban tem halor ka jinglong jingman jon ka ain ka kanun bad kumno un lah ban peit ban khmih ia ka jylla baroh kawei, nalor ba um sngap satia ia ka mon jong u paidbah ban pyntreikam ia ka Inner Line Permit (ILP) bad uba la khang syndon ia ka jingkhang ban iakren halor kane ka phang, u la bynrap.
Halor ka jingkynnoh ba ka UDP kam don ha ka manifesto halor ka jingdawa ILP, u Bah Jemino u la ong ka don ha ka page kaba nyngkong jong ka Manifesto jong ka party kaba kren halor ka jingthmu ban iada ia ka jingwan rung kyrthep jong ki mynder ha ka jylla.