Dawa ban tohkit, da ka ED, CBI ka HITO; haba ai dorkhas sha u heh BJP ka Jylla

Shillong:Ka sengkmie Hynñiewtrep Integrated Traditional Organization (HITO) mynhynnin ka sngi, ki la leit ban ai ia ka dorkhas, ha u State President jong ka BJP, u bah Ernest Mawrie, ha ka ban dawa ia ka ED bad ka jingtohkit CBI halor ki kam bamsap hapoh ka jylla.

U President jong ka seng, u bah Donbok Dkhar, haba ai jingkren ha khmat jong u president ka BJP, ula ong ba halor ka jing ong ba kin pynbiang ia ki kot ki sla, ki la dep ban pynbiang baroh naduh u 2014 ter ter haduh kaba mynta, khnang ba kin lah ban buddien bad ba kam don jingeh shuh ba kin dawa ED bad ban phah ia ka CBI.
Na ka liang jong u State President, ka BJP, u bah Ernest Mawrie, ula ong ba ha kaba iadei bad kane kin hap ban pule bniah bad ia kaei kaba ki dei ban leh, ki hap ban leh kum ka jingdawa jong ka seng bad ula ong ruh ba ha kaba iadei bad kane un sa shimkhia bad phah ia kane ka jinglehtuh jong ka sorkar jylla sha ka sorkar pdeng.

Ha ka jingiakren bad ki lad pathai khubor, u bah Donbok, ula ong ba na ka liang jong ka seng, ka la aiti ia ka jinglap bamsap ha u state president jong ka BJP bad halor ki mat kiba pher bapher jong ka jylla. Ula ong ruh ba ki dei ban thung da ka CBI ban ioh ban tohkit halor ka jingtih beaiñ bad shalan tuh ia u dewïong hapoh ka jylla kaba la jia ha kine ki sngi ba mynta.

U bah Donbok, u la kyntu ruh ia ka sorkar pdeng ba ka dei ban thung ruh da ka CBI halor ki kam bamsap kiba pher bapher ba la leh da kiwei ki sorkar bad kane ka sorkar ba mynta ha kaba iadei bad ka jingtih beaiñ ia u dewïong, ka jyrsih bamsap haka thungkam ia ki nonghikai skul, ka bamsap ha ka jingshalan tuh ia u khaw hapoh ka tnad social welfare, ka jinghap bad khyllem ka tnum jongka iing dorbar thawaiñ ka jylla bad kiwei kiwei. La iathuh ruh, ba na ka liang ka seng kin ap hapoh ka shitaiew bad lada ka BJP kam lah leh eiei, kin sa wad lad ban leit iakynduh markhmat ia u myntri korbar ri u Amit Shah.

Na ka liang jong ka seng, ki la ai ruh ia ka kaiphod, sha ka BJP khnang ba kan suk ban wad bad na ka liang jong u President ruh u la kubur ba ia kane ka kaiphod un phah bad ka lah long kaba suk ban phah ia ka dorkhas shaduh Delhi bad ban phah ruh ia ka CBI bad ka ED hapoh ka jylla.