Dawa ban khang noh ia ki jingkieng thew kali ha 7 mer

Jowai, 27 Nailur:
Ka Jaintia Hills Cement Manufacturing Association (JHCMA) kaba dei ka seng ki karkhana pynmih dewbilat ka la dawa na ka sorkar jylla ba dei ban pynduh noh ia ki ar tylli ki jingkieng thew kali, kiba don ha Hynniaw Mer bad kaba don ha Byndihati.
Ka JHCMA ka la pan jingpynshai ruh na u Transport Minister halor ka hukum jong ka iing bishar ba ha khlieh duh ka ri ha kaba iadei ba ka sorkar kadei ban shim ia ka rai ba haduh katno tylli ki Weighbridge ki dei ban don ha Meghalaya.
Ka Supreme Court ka la pynmih ia ka hukum katkum ka SLP No. 17901-02/2015 dated o6-11-2016 kaba mih na ka hukum jong ka Guwahati High Court dated 07-06-2011 WPC No. 6845/2010 bad WPC No. 206/2011 kaba la btah iaka sorkar jylla ban shim ia ka rai ba haduh katno tylli ki weighbridge kidei ban don ha Meghalaya.
Hynrei na ka liang ka sorkar jylla haduh mynta kam pat shym la pyntreikam ia katei ka hukum jong ka iing bishar Supreme Court.
Na ka liang ka JHCMA ka la dep ban ai ia ka dorkhas sha u Transport Minister, uba la wan jurip ia ki Weighbridge ha Jaintia Hills ha kane ka sngi Nyngkong.
Katkum katei ka dorkhas, ka JHCMA ka la ong ba ka sorkar jylla kam pat shym la leh eiei halor katei ka hukum bad kane ka jingbym shym la leh eiei ka sorkar, ka pynmih ia bun tylli ki weighbridge bad ki check posts ha ki surok bah.
Kane ka jingbun ki weighbridge ha u surok bah National Highway NH 6 bad NH 206 ka la pynlong ia ki trok kit mar kit mata ban thew bunsien bad ban siew ruh ia ka khajna kaba buh dor hi katba mon da ki trai weighbridge khlem da bud ia ki kyndon jong ka sorkar jylla.
“Ka la don ruh ki jingkynnoh ba kitei ki weighbridge ki la shim pisa katba mon khlem da bud satia ia ka dor ba la buh da ka sorkar jylla”, la ong ka JHCMA. Kitei ki Weighbridge kim ju ai slip ruh sha ki driver.
Ka JHCMA ka la kyntu ia u Minister badei peit ia ka tnad Transport ban shimkhia halor kane khnang ba kin nym don bun tylli ki weighbridge ha u National Highway.
“Ngi sngewba ka sorkar ka dei ban pynduh noh ia ka 7th Mer Weighbridge bad ia kaba don ha Byndihati namar ba ki dei ban don tang ha Exit Point kumba leh lang ha ri India baroh kawei”, la pynpaw ka JHCMA