Dawa bai skul U Principal KV NEHU

Shillong,14 Jymmang:
Ka Khasi Students’ Union lyngba ka Education Cell ka pynpaw ia ka jingpyrshah ia ka skul Kendriya Vidyalaya, NEHU halor ka jngbym ai ia ka resol ia ki khynnah pule jong katei ka skul.
Ki khynnah skul ki la ioh rung sha kate ka skul lyngba ka Right of Children to Free and Compulsory Education Act. Kat kum ka jinglap ka KSU lyngba ka kyrwoh na u chairman ka Education Cell u samla D.V Thabah ka la ong ba ha kaba nyngkong kitei ki khynnah skul kim donkam ban siew ia ki tuition fees namar katkum ka Act kim donkam ruh ban siew ia ki bai skul namar ki hap hapoh ka ST category.
Hynrei kynsan kynsan u Principal katei ka skul u la dawa na ki ba ki dei ban siew la ki bai skul namar u ong ba ka sorkar jylla ka la hukum ia baroh ki skul ba ki dei ban pynkylla ia katei ka ain ba naduh ka 8 atrik u nailar 2013, ba ki ST ki ba lait na ka ba siew bai skul ki dei tang kito ki don ia ka BPL Card.
Ka KSU ka

la iathuh ruh ba ki kmie ki kpa ki la lap ba kiwei kiwei ki skul Kendriya Vidyalaya hapoh jylla kim pat dawa BPL cards na ki khynnah skul bahap ha ka thup Scheduled Tribe hynrei ki pyllait lut nadong shadong ia baroh ki khynnah skul kiba hap ha ka thup ST ban siew ia ki bai skul ki jong ki. Shuh shuh ka la ong ba ki kmie ki kpa ki la leit ia kynduh ruh ia u Principal Secretary jong ka tnad pule puthi jong ka jylla bad kaba pynlyngngoh ia ki ka long ba u Principal Secretary u la pyntip sha ki ba u khlem ai kano kano ka hukum ia ki skul Kendriya Vidyalaya ha kaba iadei bad katei ka phang haneng. U principal Secretary u la pyntip sha ki kmie ki kpa ba ki skul Kendriya Vidyalaya ki don la ki jong ki kyndon bad ki hap ha ka jingpeit jong ka sorkar pdeng. Ka ba kham sngew lyngngoh shuh shuh ka long ba katkum ka shithi ba u Principal ka KV NEHU ula phah sha ki khynnah pule katei ka skul ha kaba iadei bad ka jingphah siew ia ki bai skul ula kdew ha kita ki shithi ba kane ka dei lyngba ka ‘telephonic instruction’ jong u Deputy Commisioner, KVS, R/O, Guwahati ha ka 1 tarik u iaiong 2014.
Ka seng ka la pynpaw ia ka jinglyngngoh ba kumno kat ia kat kane ka kam kaba khia la pyntreikam tang lyngba ka jingiakren ha phone bad ym shym la ai da kano kano ka jingthoh ban long ka sakhi kumba leh kiwei kiwei ki skul ne kolej. Halor kane ka mat ka seng ka la ong ba kan sa tih bniah shuh shuh bad ha kajuh ka por ka dawa na u Principal ka KV NEHU ba u dei ban weng noh mardor ia ka hukum ban phah siew bai skul ia kitei ki khynnah bad ban pynlait noh mardor ia ki result ki jong ki khnang ba kan ym ktah ia ka lawei ka jong ki.