Dawa bai lutksan, ba bom samla kynthei ki pulit shynrang

Shillong, 12 Naiwieng:
Ki samla pule hapoh ka lama ka Kiang Nangbah Govt College Students Union (KNGCSU) ki la pynrem jur ia ka jingbom bad jingtied lathi ki pulit shynrang ia ki samla pule kynthei ha ka jingiaid paidbah jongki ha kane ka sngi Hatmajai ha DC ophis, Jowai.
Ka KNGCSU ka la ong, “Ngi pynrem ia ki pulit shynrang kiba shoh bein ia ki samla pule kynthei jong ngi kaba long shaba palat haduh kaba kiba bun ki mynsaw na kane ka jingshoh kulmar jong ki. Ka sorkar ka dei ban pynshitom ia kine ki pulit shyn rang kiba pynmynsaw ia ki samla pule kynthei kaba ktah ia ka hok longbriew manbriew jong ki bad ngi dawa na ka sorkar ba kan pynshitom iaki katkum ka kyndon jong ka ain”.
Ka KNGSCU ka la pynpaw ia ka  jingsngew lyngngoh ba ha katei ka sngi u DC ka West Jaintia Hills, ryngkat bad ki pulit langrut u leit ban wan kthong ia ki samla pule.“Kawei kaba pynsngew phylla ia ki samla pule ka long, balei kat u DC u long katjuh ka bor kum ki pulit langrut ban leit beh kthong lang ia ki Samla pule ryngkat bad ki pulit sha surok”, la ong ka KNGCSU. Ka la ong ba ka jinglehbor ka pyni ia ka jingtlot jong ka synshar  paidbah ha ka Ri bad kaba pynartatien ia ka lawei ba phyrnai jong ka jaitbynriew.Ka seng ki samla pule ka la ong ba ka sorkar ka dei ban siew iaka bailutksan kaba ki samla pule ki la sah hospital na ka daw ka jingshah shoh ha ki briew jong ka ain halor ka jingjia ba la dep jia ha ka 10 tarik Naiwieng. Ka KNGCSU ka pynshai paidbah ruh ba ka jingialang paidbah, ha ka 10 tarik Naiwieng ka long ban dawa ia ki mat bapher bapher ba ki samla pule ki dei hok ban dawa katkum ka synshar paidbah jong ka Ri. “Ngi kwah ban pynshai ha ka jingiadei bad kawei na ki mat halor ka jingshah kawang maw jong ki briew ka sorkar, ha ka jingshisha  na ka liang jong ngi ki samla pule  ngim don jingmut ban pynkulmar ne mih ka jingsngewsih na kane ka jingiaid jai jai, kaba ngi iaid ban dawa iaka hok hynrei napdeng pat don ki riew shim kabu kiba kwah ban pynthoh bria ia ngi ki samla pule bad ngi pynremjur ia kine ki riewshim kabu kaba pynthoh bria ia ngi kum ki samla pule”, la pynkut ka kyrwoh na ka seng.