Dang wad bniah ban wanrah lynti rel, ha East Jaintia, ong u MR

Shillong:U Myntri Rangbah ka Jylla Conrad K Sangma, hynnin ka sngi Palei ula pyntip ba ka jingwad bniah (study) kala ïaid mynta ban wanrah ïa ka lynti rel ha East Jaiñtia Hills District.

Haba ïakren bad ki nongthoh khubor, u Conrad ula ong ba haba phai sha Khasi Hills bad ki bynta ka Ri-Bhoi District, baroh ki kam kila sangeh lut.
“Ka la don ka jingïakren bad ka Sorkar India ba ka pisa bala mang ïa kane ka project yn sa rah noh shawei bad yn pyndonkam noh sha kiwei ki project jong kiwei ki Zone lane ki thaiñ jong ka Jylla kiba kloi ban pdiang ïa ka lynti rel,” ula ong.

U Conrad ula ong, “Ka la don ka jingwad bniah ha East Jaiñtia Hills ban pynïasoh lynti rel sha Khliehriat. Hynrei kane ruh ka shong ha ka jingïakren bad ki nongïalam shnong bad ki trai nongshong shnong nalor ki kynhun bapher bapher, ngin sa ïapeit ïa kaei kaba mih”.

U Myntri Rangbah ula ong ba ka Sorkar India kan nym shu ïai ap namar ka lah ruh ba kan pyndam noh ïa kane ka project lynti rel haduh ka Shillong bad ïa ka pisa yn sa pyndonkam noh sha kiwei ki zone kiba lah ban pynïasoh lynti rel.