Dang tohkit halor ka jingiap ki 7 ngut ha Khliehriat

Shillong, 5 Naitung:
Ka sorkar ka la thung da ka jingtohkit ia ka jingkhlad jong ki hynniew ngut kiba la shah lympat ha ka bording elektrik kaba dang shu jia shen ha Khliehriat jong ka East Jaintia Hills.
Katkum ka khubor ba la ioh na ka MeECL, la iathuh ba ka ophis jong ka Deputy Commisioner jong ka East Jaintia Hills ka dang pynlong ia ka jingtohkit halor ka jingiap jong ki hynniew ngut ki mynsiem ba kordor.
Haba u Rupang u la wad jingtip halor katei ka jingjia na ka MeECl ki la kyntait ban ong eiei halor kane ka jingjia namar ka dang don ha ka jingtohkit. “Ngim pat lah ban ong eiei halor kane ka jingjia”, la ong uwei na ki heh ka MeECL.
Lah ban kdew ba kane ka jingjia la jia ha ka 27 tarik jong u bnai Jylliew ha kaba 7 ngut ki la iap ei ha ka ding elektrik kaba 11KV. Kine ki hynniew ngut kiba la duh ei ia ka mynsiem kordor jong ki, ki kynthup ia ka Sankhini Bamon, ka Dakino Bamon, ka Ani Paia Bamon, ka Rose Mary Bamon, u Ma Lastingson Rymbai, ka Lumlang Pdang bad u Heimon Mi Pdang.
Ka jing iap jong kitei ki hynniew ngut ka la jia ha ka por shiteng synnia ha kaba u sainar elektrik uba don ha syndah jong u Ma Sampoi Swer ka la par ding sha katei ka ing jong ki.