Dang thwet jur ki pulit ia ki sleeper cell jong ka HNLC

Shillong:Ki Pulit jong ka Ri-Bhoi ha ka sngi Balang, ki la ioh ban kurup biang ia ki bomb, ka pistol bad ki lama jong ka seng kiengatiar Hynñiewtrep National Liberation Council (HNLC) na ki bynta jong ka Ri-Bhoi District.
Ka jingioh kurup jong ki pulit ka dei hadien ka jingphla jong ki suba kiba la shah kem bad ialam lynti ia ki pulit ban pynlong jingkhynra ia ka Ïingsah.

Ki heh pulit ki iathuh ba kine ki jingjia ki la wan jia hadien ka jingtohkit ia ka case bala register hapoh ka Nong poh Police Station hapoh ka kyndon 120B/121A IPC pule lang bad ka kyndon 10/13/18 UA(P)Act bad ka kyndon 5/6 Explosives substance act.
U Superintendent of Police ka Ri Bhoi u pyntip ba ki tiar ba ioh kurup na kane ka Ïing ki kynthup ia kawei ka pistol, katto katne ki galatin stick, ki detonator, ki ignition fuse bad ki lama HNLC.

Ha ka jingtohkit, ki pulit ki la shem ba ki nongialam jong ka seng HNLC na ri Bangladesh kila ai jingbthah ia ki dkhot jong ka Sleeper Cell ba kin pynbthei bomb ha Shillong bad Nongpoh.
Ki nongialam jong ka HNLC kila thong ban ai da ka song pisa kaba heh kynthup ki kali thymmai ia kine ki dkhot jong ka Sleeper Cell ba kin pynbthei bomb IED.

U iathuh ba dei kane ka kynhun jong ki Sleeper Cell jong ka seng HNLC kiba ju pynher ia ka lama jong ka seng HNLC ha ki snem ba la leit noh hadien ba la ioh ia ka jingbthah na ki Nongialam jong kane ka seng na ri Bangladesh.
Ka jingtohkit mynta ka dang iaid shaid shaid ban nang lapdien shuh shuh ia ki kam ka Sleeper Cell ka HNLC.