Dang thwet ia kiba thmu rahbor ia u khun heh pulit, ong u SP

Shillong, 4 Naiwieng:
Na ka liang jong ki pulit wat la ki la ioh ia ki jingring dur video lyngba ki (CCTV) halor ka jing thmu jong ki runar ban rahbor ia u khun jong u heh pulit ka East Jaintia Hills na phyllaw St. Edmund College, hynrei haduh mynta kim pat ioh kem satia ia kitei ki runar.
“Ngi dang pynlong ia ka jingtohkit bad haduh mynta ngim pat ioh kem iano iano ruh bad ynda ngi la ioh kem ngin sa pyntip bad ka jingthwet ka dang iaid shaphrang” la ong u SP jong ka East Khasi Hills District u bah M Kharkrang haba kren ha u nongai khubor mynta ka sngi. Lah ban pynkynmaw hangne, ba na ka liang jong u Principal jong ka St. Edmund College, Sylvenus Lamare hadien ba u la ioh jingtip na u khun jong u SP ka East Jaint Hills District u bah MK Dkhar halor ka jingthmu jong ki runar ban rahbor ia u, u la leit ban ujor sha ki pulit jong ka thanat Laitumkhrah na ka bynta ban kem ia kitei ki runar.
Hadien kane na ka liang jong u Principal u la iathuh ba la dep ioh ring dur lyngba ki CCTV ia kitei ki runar kiba thmu ban rahbor ia utei u khun jong u heh pulit namar ha phyllaw jong katei ka college la buh ia ki CCTV ban ioh ring dur ia kiba thmu bad ki nongleh kam sniew.
Na ka liang jong ki pulit ruh hadien ba la ioh jingtip halor kane ka jingjia ki la pynlong ia ka jingtohkit bad ki la shim ruh ia kitei ki video ba la dep ring lyngba ki CCTV, hynrei katkum u SP bah M Kharkrang mynta ka sngi, ka long ba haduh mynta ym pat ioh kem ia no iano ruh bad ka jingtohkit ka dang iaid shaphrang.