Dang sahkut ki nong Mawpud, na ka jingtwa khyndew, ha ka 16 Jylliew

Shillong: Wat hadien shitaiew ba la don ka jing twa khyndew, hynrei ki paidbah ka shnong Mawpud hapoh ka thain South West Khasi Hills, ki dang don hapdeng ka jing jynjar namar kim pat lah ban leit ban wan namar ka jing shah khang lynti ka surok kali ban poi sha shnong.

U myntri ka shnong Mawpud u bah MacDonald Thongni u la iathuh ba ka jing ther u lapbah ha ka 16 tarik mynta u bnai ka la wanrah ka jing twa khyndew ha ki bynta ka surok PMGSY ha Lad Dom Mawlein ka ba jngai kumba 5-6 km ka pyniasnoh iaka shnong Mawpud hynrei haduh mynta ki paidbah kane ka shnong kim pat lah ban donkam iaka surok namar haduh mynta ki bor badei khmih ia kane ka surok kim pat lah ban weng iaki maw bad khyndew ba khanglad ia kane ka surok.

“Watla ka jing twa khyndew ka la jia naduh 16 tarik hynrei haduh mynta ym shym la weng iaki maw bad iaki khyndew ba khang iaka surok ban poi sha ka shnong Mawpud bad kane ka buh jingeh iaki paidbah khamtam haba iadei bad ka jing kit iaki marbam bad kumjuh ruh ban leit sha ki jaka sumar” la ong u bah Macdonald.
U bah Macdonlad u la iathuh ba kane ka surok PMGSY kadei ba sdang naduh ka shnong Umpung bad ka ba pyniasnoh iaka shnong Mawpud bad haduh mynta kane ka shnong ka dang don tang kawei ka surok naka bynta ban pyndonkam khamtam haba iadei bad ka jing thied marbam kum na Balat lane na Ranikor.

U la ong ba namar ka jing bym shim khia ki bor badei peit ia kane ka surok, ki paidbah nong shong shnong haduh mynta ki hap ban iaid kjat da ki kynta naka bynta kit iaki marbam ban pynpoi sha shnong.
“Ka jing twa khyndew ka la pynjulor ruh iaki mar rep bad iaki Pipe um ba la tan naka bynta ban pynpoi um shapoh ka shnong” u la ong.
Shuh shuh u la ong ba kane ka jing bym pat lah ban weng iaki maw bad khyndew ha kane ka surok ka buh jingeh khamtam haba iadei bad ka jing donkam ban leit sha ki jaka sumar lane ban thied dawai kumno na Ranikor ne na Balat.

Halor kane u myntri ka shnong Mawpud u la kyntu iaka tnat PWD bad ia u MLA ka thain u bah Pius Marwein ban shim khia halor kane ka jing weng noh iaki maw bad khyndew ba khang lynti iaka surok ban poi sha shnong naka bynta ban pyllait iaki paidbah na ka jingeh ha ki sngi ban wan” la ban biang u bah Macdonald.