Shillong:U Symbud myntri rangbah ka jylla u bah Prestone Tynsong u la pyntip ba ka sorkar ka la siew bai jaka T.121.40 klur sha ki trai jaka kiba hap sha Ri Bhoi bad T.455.39 klur sha ki trai jaka kiba hap ha East Khasi Hills kiba hap ha ka surok Western Bypass.
Ia kane ula pyntip hapoh ka iing dorbar mynhynin ka sngi halor ka jingkylli kaba la wanrah u nongialam liangpyrshah u Dr. Mukul Sangma.
U bah Prestone u la pyntip ba ia ka jingpynbna la leh da ka ktien Khasi bad phareng ban kham pynsuk ia ki paidbah ban sngewthuh. U la ong ba baroh ki trai jaka kila sngew hun ia ka jingsiew bai jaka lait noh tang katto katne kiba don ka jingiakam ia ka jaka.
U Dr. Mukul ula ong ba hato ka sorkar ka la pynshisha ba ki don ki kynhun kiba la kynnoh ba ki trai jaka kim ioh ia ka bai jaka ne ka jingleh bakla.
Halor kane, u bah Prestone ula kubur ba ka don kaba kum kane hynrei la bynshet ka bor district ban pynbeit ia kane ka kam. U la ong ba ka sorkar ka la shim jaka 97.5 percent bad kaba sah sa 2.5 percent dang shim khia ki bor district.
Halor kane, u MLA ka Nongkrem u bah Ardent M Basaiawmoit ula buh jingkylli ba ka don ka jingujor na ka seng halor ka jingpyndonkam bakla ban siew jaka sha ki trai jaka. Ula buh jingkylli ruh hato dei shisha ba ki don 2 ngut ki briew kiba kam bai jaka ha jaka ki trai jaka.
Na ka liang u bah Prestone ula ong ba kam don kano kano ka jingpyndonkam bakla ia ka pisa ban siew bai jaka. U bah Prestone u la ong ba ula shu iohi ha ki lad pathai khubor ba ki don kiba shim percentage hynrei haduh mynta ka sorkar kam pat ioh kano kano ka jingujor ha ka sorkar. U bah Prestone ula ong ba ka lah ban dei ba kim nang bha ban pyndap ia ki kot ki sla bad ki phah iarap ha ka jingiasngewthuh jongki.
U la ong ba ki don ki jaka kiba iaknieh kni ban kam ba u dei u khlieh ka kur bad uwei pat u wan sa uwei uba kam kni bad kane ka la wanrah ka jingiakam hapdeng jongki bad ka sorkar ka dang pynbeit bad ki.
Ki don 3 tylli ki song kane ka surok bad la dep ban sdang shna ia mynta.
Phi don ban ong eiei?