Dang pynkhreh ka sorkar da ki rel kyrpang ban leit shaw iaki samla ba sahkut hapoh Maharashtra bad Goa

Shillong: U symbud myntri rangbah ka jylla u bah Prestone Tynsong, mynta ka sngi, u la iathuh ba ka sorkar Meghalaya ka dang pynkhreh da ki rel kyrpang na ka bynta ban leit shaw ia ki samla ka jylla kiba sahkut kum ha ki sorbah ha Mumbai, Pune bad hapoh ka jylla Goa.

Nalor kane u bah Prestone Tynsong, u la iathuh ruh ba ki la don kumba 9000 ngut tam ki samla ka jylla kiba sahkut ha kiwei pat ki jylla ka ri India kiba la wanphai shapoh Meghalaya bad ki don sa kumba 5000 ne 6000 ngut ki samla ki ban wanphai sha Meghalaya.

U bah Prestone Tynsong u la iathuh ba ka Rel kyrpang napoh ka jylla Telengana kaba kit 231 ngut ki samla ka jylla, kan poi sha station rel Guwahati mynta ka janmiet bad ka rel na Haryana kan poi shapoh station rel Guwahati ha ka 24 tarik jymmang 2020 kaba kit kumba 139 ngut ki samla ka jylla.

Haba dei pat bad ki samla ba sahkut hapoh ka thain Delhi, u bah Prestone Tynsong u la iathuh ba ka Rel kyrpang kan mih na Delhi ha ka 27 tarik jymmang 2020.

“Lada don ki samla kiba don hapoh Delhi bad ki jylla ba marjan kiba shem jing jynjar ban ioh tickets ‘online’, ki dei ban phone ha ki nomber 01123014341, 01123014451 bad ha u 9968262299 naka bynta ban ioh jing iarap” la bynrap u bah Prestone Tynsong.

Na ka liang u bah Prestone Tynsong, u la iathuh ruh ba ka Rel kyrpang napoh ka jylla Rajasthan kan mih na nongbah Jaipur haka 26 tarik jymmang 2020 bad iaki ba sahkut hapoh ka jylla Maharastra bad Goa, ka sorkar Meghalaya kan pyndep iaka jing leit shaw ia baroh ki samla ha shwa ban kut u bnai jymmang.

U symbud myntri rangbah u bah Prestone Tynsong, u la iathuh ruh ba shen ka sorkar kan pyntreikam noh ia ka kad lengsuin kaba don ha Umroi bad pyniaid Lengsuin na Umroi sha Kolkata ne na Kolkata sha Umroi kum shi bynta ban pynsuk ia kiba sahkut ban wanphai noh sha Meghalaya.

Kumban shu pynkynmaw dang shen ka tnat MHA, ka la pynmih iaka hukum ba naduh 25 tarik jymmang 2020 ki liengsuin ki lah ban sdang treikam noh ryngkat ka jing bud iaki kyndon ka tnat ka koit ka khiah.