Dang pynkhreh ban plie ia ka Mawlai Block

Shillong, 09 Rymphang:
Hadien ba la plie ia ka Bhoirymbong bad ka Sohiong Block, bad ar tylli sha Garo Hills, u Myntri Rangbah ka jylla u Dr Mukul Sangma u la ong ba ka sorkar ka la pynkhreh shaid shaid ban plie noh sa ia ka Mawlai bad ka Mylliem Block.
Haba kren mynta ka sngi, sha ki nongthoh khubor u Dr Mukul u la ong ba um tip eiei ba kan don kano kano ka jingeh ha ban ioh jaka ban buh ia ka Mawlai Block. “Ngam tip eieie ba kan don ka jingeh ne ka jingiaknieh jaka ban buh ia ka Mawlai Block”, la ong u Dr Mukul.
U la ong ba ym dei ba ka sorkar ka pynslem ban plie ia ka Mawlai Block, hynrei ka dang pynkhreh shaid shaid ia kane ka kam hadien ba ka la pynkhreh ruh ban plie ia ki saw tylli ki civil sub division, 13 tylli ki Police Station ha ka jylla nalor 6 tylli ki Block thymmai.
“Ngi dang ap ia ka sngi kaba biang ban plie ia ka Mawlai Block, ngi don hynriew tylli ki Block ban thaw thymmai, 13 tylli ki Police station bad saw tylli ki civil subdivision”, la ong u Dr Mukul. Ha kaba iadei bad ki Civil sub division, u la ong ba ka sorkar ka dang pynkhreh ban pynbit pynbiang ban pyniakhlad ia ka bor ka Executive bad ka Kashari bad hadien ba la pynbiang, kan sa plie ban pyntreikam noh ia ki.