Dang lum ka IT na ki bank, ia kiba thep pisa ha Meghalaya

Shillong, 14 Nohprah:
Ka Tnad Income Tax Department, Shillong ka dang lum dang lang ia ki jingtip ban ai ki bank bapher bapher ia ki briew ba thep pisa ha kylleng ka jylla bad ia kane, yn sa pyndep hadien ba la kut ka 30 tarik mynta u bnai.
Haba iakren bad ka ophisar jong kane ka tnad ha Shillong, ka la iathuh ba ia ki jingtip ba la phah ki bank jong kito ki briew ba thep pisa kiba shan khmat, yn sa pan jubab hadien ba la kut kane ka 30 tarik Nohprah.
“Ki riewlum ki lait na ka jingsiew ia ka jingkamai ne Income Rax hynrei ngin hap ban kylli lada don kito kiba thep pisa kiba long shan khmat bha, naei ki ioh pisa ne ioh don kiba pynthep lem”, ka la ong.
Ka la ong ba lada don ki riewlum kiba shu pynthep lem ia ki bym dei riewlum ne kiwei, kin hap ban jubab ia ka jingkylli bad kin shah pynshitom katkum ka ain.
“Lehse don ki bym dei riewlum kiba kamai da ka pisa tuh ne thied tiar suloi, khaii black, shu phah pynthep lem ha ka account jong ki riewlum, kin shah pynngat ha ka ain”, la ong.
Haduh mynta, halor ka Benami, na ka liang ka Kong Syiem ka la ong ba kam pat ioh jingbthah na ka sorkar pdeng bad ka shu iohi shwa ha ki kot khubor. Ka la ong ba ioh ba kim pat phah ka jingbthah ka lah ban sa poi ha kine ki sngi.