“Dang khmih ka sorkar, ban buh bun ki ophis Block sha nongkyndong”

Shillong:Ïa ka prokram kaba long kum ka dak ban pynkynriah ïa ka Khliehriat C&RD block sha Wapung la pynlong ha ka sngi Palei hapoh Wapungskur, East Jaiñtia Hills District.

U Myntri Rang bah ka jylla u Conrad K. Sangma u la long u kongsan ha kaba la synran lang da u Myntri ka C&RD, u Bah Hamletson Doh ling bad u Myntri ka Social Welfare, Bah Kyrmen Shylla.

Ha ki jingkren, na ka liang u Myntri Rangbah u la ong ba ka jingpynkynriah ïa ka C&RD block na Khliehriat sha shnong Wapung kan wanrah ïa ka jingtreikam ki bor pynïaid distrik shajan ki paidbah bad bynrap ba ka sorkar kan khmih bniah ïa ki jingdonkam ban thaw bun ki ophis block ha ki jaka kiba dei hok ban ïoh jingpynkhlaiñ.

“Katkum ka jingdonkam jong ki briew ka jylla, ka sorkar kan khmih bniah ïa ka jingbuh ïa bun tylli ki administrative block. Ki bun ki jaka bad thaiñ ha ka jylla kiba ïa jngai ha kaba ki briew ki hap ban ïaid jngai ban ïoh ki jingshakri ka sorkar bad kane ka long ka bym bha na ka bynta ki nongshong shnong. Ka sorkar ka dang khmih bniah ïa ki jinglah ban buh bun ki bor pynïaid Sorkar kum ki block ban wanrah khamjan ki jingshakri sha ki briew,” u la ong.
Haba banjur ïa ki jingdonkam jong ki C&RD block na ka bynta ki jingtreikam Sorkar, u Myntri Rangbah u la ong, “Ki ophis Block ki long ki ophis kiba donkam tam sha ki thaiñ nongkyndong. Bun na ki skhim, khamtam jong ka Sorkar Pdeng la pyntreikam lyngba ki block bad namar kata ka long kaba kongsan ba ki briew kin ïoh ki jingpynsuk ban ïoh ki kam pynroi ba la sdang da ka Sorkar.”