Dang iathain ka jaka ban tei ia ka Kynshi projek- I bad II

Shillong, 24 Naitung:
Ka jingshim jaka ka sorkar na ka bynta ban tei ka ka projek bording ka Kynshi-I bad II ha West Khasi Hills, ka dang iathain bad kam pat dep satia haduh kine ki sngi.
Katkum ka jingong ka sorkar, ka jingshim jaka na ka bynta kane kan long sa tang ar bnai eiei bad mar ia dep, kan sdang noh ia ka kam.
U myntri ka tnad bording ka jylla u Clement Marak u la iathuh hynne ka sngi Palei ha ki nongialam ka Synjuk Seng Bhalang (SSB) na West Khasi hills district, ba ka sorkar ka la iaid shaid shaid ban shim jaka na ka bynta kane ka kam. Ki sengbhalang ki la iakyn duh ia u ban kyntu ba ka sorkar kan pynsted noh ia kitei ki ar tylli ki projek.
Ka SSB ka la pan jingshai na u myntri bording, balei ka slem ban pyntreikam ia kitei ki projek watla ka sorkar ka la dep iasoi ia ka soskular la kham slem mynta.
“U myntri u la iathuh ba ka sorkar ka dang shim jaka shaid shaid mynta bad kan pyndep ia ka jingburia ia ka bai jaka sha ki trai ba hap ha kitei ki projek. Kan shim por sa kumba ar bnai eiei ban pyndep ia kane”, la ong u chairman ka SSB u Bah TS Shangrit ha ki nongthoh khubor hynne ka sngi.
U la ong ba ba ka SSB ka la ong ia u ba kane ka kam ka don ha kti jong u Deputy Commissioner ba un pyndep ia ka jingshim jaka hapoh ka por ba la buh. “Ngi la rai ban ap ia ka sorkar ban pyndep ia ka jingshim jaka”, la ong u Bah Shangrit.
Katkum ka jingong u chairman ka SSB, ka jingpynslem ban pyntreikam ia kine ki projek, ka la pynduh nong ia ki paidbah bad ka jylla. U la ong ba kine ki projek kin long ruh ki lad ai kam ia ki samla.
Lah ban kdew ba ka sorkar ka la aiti ia kine ki ar tylli ki projek bording ba 450 MW sha ka Athena Energy Ventures Pvt Ltd na ka bynta ka Kynshi Stage-I bad ka JayPee Group ka la ioh ia ka Kynshi Stage-II.
Ka SSB ka dei ka kynhun jong ki san tylli ki sengbhalang na West Khasi Hills ba kynthup ia ka West Khasi Student Union (WKSU), Western Youth Federation (WYF), Western Youth Welfare Council (WYWC), Western People Movement (WPM) bad ka West Khasi National Youth Front (WKNYF).