Dang iaid ka jingiakren ban iasoh BJP U Bah Antonio

Shillong, 02 Naiwieng:
U MDC phet seng na ka party Congress u Bah Neil Antonio War u la lah ban leit iathong shongkurim noh bad ka party thymmai ka BJP shen. U Bah Antonio u MDC ba jop na Laitumkhrah la ar sien na ka Congress, u la don ka jingiakren bad ki nongialam ka BJP ha kane ka jylla ba un rung noh ialade sha kane ka partykaba synshar ha ka sorkar pdeng ha ka ri India.
“Ngi dang iakren, ngim pat shim rai haduh mynta. La kumno kumno ngin sa shim ia ka rai lashai ne lashi sngi halor kane”, la ong u President ka BJP u Bah Shibun Lyngdoh.
U la kubur ba ka la don ka jingiakren hapdeng ka BJP bad u Bah Antonio ha kine ki sngi tangba ka rai kaba kut, ym pat shim satia namar ba kam pat poi sha uta u pud ban pynbna ia ka rai.
“Ngin iashong biang lashai la shi sngi bad kaei kaba ngin sa shim ia ka rai ngin sa pynbna paidbah”, u la ong u Bah Shibun uba dang don mynta ha nongbah Tura ban pynkhlain ia ki kam party.
Katkum ka khubor ba la iohlum, la iathuh ba ka la don ka jingiakren pynbeit hapdeng ki nongialam ka BJP bad u Bah Antonio ha kine ki sngi ka la iaid naduh ba u la mih na ka party Congress hynrei kim pat poi sha ka bynta ba kin iasei madan.
U Bah Shibun u la iathuh ba haduh mynta, ka jingiakren ka dang long tang bad u Bah Antonio, hynrei kiwei ki MDC kiba phet na ka Congress, kim pat wan ban iakren eiei la ki don jingkwah ne em ban iasoh bad ka BJP.
La sngewthuh ba ka BJP ka lah ban pdiang beit lada kine ki MDC ki kloi ban wan ban iasoh bad ka party tangba kin sa shong jingialang ban shim ia ka rai.
San ngut ki MDC ka Congress kynthup u Bah Antonio, Bah Banteidor Lyngdoh, Bah Hadrian Lyngdoh, Bah Albinus Lyngdoh bad Bah Victor Rani ki la mih noh na ka party Congress hadien ba u nongialam jongki, u Bah Pynshngain N Syiem u la shah sospon lai snem ha ka party.