Dang iaid ka jingiakren bad ka MPCC, ong u Bah Process

Shillong, 06 K’Lyngkot: U MDC ka Mawlai u Bah Process T Sawkmie u dang don ha ka jingiakren iasyllok bad ki heh nongialam ka Meghalaya Pradesh Congress Committee (MPCC) ban pynkhreh ban rung sha kane ka party.
“Haduh mynta, ngi dang iakren iasyllok bad ki nongialam ka MPCC bad kam pat don kano kano ka rai namar ba ngam pat rung ngam pat phah kano kano ka jingthoh ban rung haduh mynta”, la ong u Bah Process haba iakren bad u Rupang mynta ka sngi Balang.
Ha kane ka taiew ba la dep, ka Mawlai Block Congress ka la pynmih jingthoh sha ki lad pathai khubor ba kam pat pdiang satia ia u Bah Process ban rung sha ka iing jongka.
“Ngam pat don kano kano ka jingphah jingthoh sha ka Mawlai Block Congress ba nga kwah ban rung sha ka party”, la ong biang u Bah Process bad bynrap, mynta ka dang iaid tang ka jingiakren bad ki heh ka MPCC kumno ban leh.
Katkum ka jingong u Bah Process, lada ka jingiakren iasyllok bad ki nongialam ka MPCC ka iaid ha ka lynti kaba dei, u lah ban rung sha ka Congress.
“Hadien ba la iapynbeit bad ki nongialam ka MPCC, nga lah ban iashong iakren kham bha ruh bad ka Mawlai Block Congress”, u la ong biang.
U Bah Process u la jop MDC na KHNAM na Mawlai ha kane ka elekshon MDC ba la dep hynrei ula pyniasoh bad ka liangsynshar People Democratic Forum (PDF) hadien ba la pynkhyllem noh ia ka Executive Committee kaba ialam da ka seng riewlum.
Ka la don ruh ka khubor hamsaia ba u Bah Process u don ka jingiakren wat ban pynkhyllem ia u Bah Pynshngain N Syiem na ka shuki CEM ha KHADC da ka jingbthah jong u Myntri Rangbah u Mukul Sangma.