Shillong 30 K’Lyngkot: Ka Khasi Students’ Union lyngba ka Employment Monitoring Cell ka pynrem jur ia ka jingthung kam sop sop hapoh Khasi Hills Autonomous District Council (KHADC).
Katkum ka jinglum khubor na ka liang ka Seng, la ioh jingtip ba la thungkam ia bun ngut ki briew hapoh KHADC khlem kano kano ka jingpynlait ia ki advertisement thung kam ha kine ki khyndiat sngi bad taiew ba ladep.
Kane ka long khongpong ia kaei kaba ka Seng ka iohi ha ki tyllong khubor ha 10 tarik u Kyllalyngkot, 2025 ba na ka liang ka District Council kan pynthymmai ia ka Service Rules 1961 bad ban wan rah ia ki recruitment policy kiba shai khnang ba ka thungkam thungjam hapoh ka District Council kan long kaba khuid.
Kane kam dei shuh ka sien kaba nyngkong ba ha District Council la thungkam thungjam tuh khlem pynlait advertisement ne pynlong ia kino kino ki kynja eksamin ban jied ia ki samla wad kam hynrei kane ka ju iai jia man ka por bad ia kane la paw ruh ha ka CAG Report halor ka jingthung kam tuh naduh u snem 2017 ter ter haduh mynta.
Ka Seng mynta ka sngi 30 tarik u Kyllalyngkot, 2025 ka la leit kynduh ia u Bah D. G. Syiemiong, Secretary ka Khasi Hills Autonomous District Council (KHADC) ban jurip kham bniah halor kane ka bynta.
Na ka liang u Secretary um shim la lah ban pynshai halor ka jingthung kam thymmai hapoh District Council hynrei la batai ba ka shong ha ka rai jong ka Executive Committee jong ka District Council bad na ka liang jong ka office ka pyniaid katkum ka jingbthah.
Ka Seng ka kwah ban maham jur ba ka District Council kam dei ka nongkynti jong ki nongmihkhmat ne ki MDC ba kin thungkam ia kat kiba ki sngewbit sngewbiang khlem don ki eksamin thungkam kaba khuid kaba suba.
Ka Seng kan sa buh ia ka dorkhas ha khmat u CEM ka KHADC ha kine ki sngi bad ha ka juh ka por ka dawa ba dei ban pynsangeh shi syndon ia ki appointment thymmai ba dang shu dep ha kine ki sngi ia bun ngut ki briew khlem kano kano ka recruitment kaba biang lem kumta ka Seng kan hap ban shim da kiwei ki sienjam.
Phi don ban ong eiei?