Ka seng BJP, kam pat shym la kynran dien satia, ha kaba pyrshang ban pynrung ia ka ain buhai shnong jong ki poiwir lane ka Citizenship (Amendment) Bill, 2016 bad mynta la sngewthuh ba kan iaid da kawei pat ka lynti ban ioh pynrung ia katei ka bill ha Rajya Sabbha.
U Ram Madhav, General Secretary jong ka seng BJP, uba peit ia ka thain shatei lam mihngi, u iathuh ba ia katei ka bill, yn pynrung ha Rajya Sabbha, ha kano kano ka sngi, ba kan mynjur ka iing dorbar, tangba kan dei kum ka bill, kaba yn pynkylla noh na ka dur kaba rim jongka.
La iathuh ba ka tnat kam poh iing, ka dang iaid ban iakren bad ki kynhun bapher jong ka dorbar Rajya Sabbha, na ka bynta ban ioh ia ka jing mynjur lang, da ka lynti kaba pdeng jong baroh ki dkhot ka iing dorbar.
“Ka bill, kam shym don satia ha ka thup jong ka Rajya Sabbha, hynrei, yn lah ban pynrung ha katei ka iing, kum ka supplementary bill, ha kano kano ka sngi, ha kane hi ka dorbar” ong U Ram Madhav.
La iathuh ba u myntri kam poh iing, u dang iakren bad ki nongialam bapher jong ki sorkar ha ki Jylla jong ka thain shatei lam mihngi bad la shim ruh ba kin mynjur ia ka lynti kaba pdeng, halor katei ka ain, ong shuh U Madhav.