Nongpoh: Namar ka jingnangkiew ka jingdon ki briew kiba la shah ktah ha ka khlam COVID-19 hapoh ka Distrik bad kaba la ktah wat sha ki shnong nongkyndong, kumta na ka bynta ban tehlakam ia ka jingsaphriang ka khlam COVID-19, ka District Magistrate Ri-Bhoi District, ka la pynbna paidbah ba kat haduh mynta, ka jingpynkhing ha la leit ka wan ki paidbah kan dang iai treikam bad nalorkata, la pynjari ruh ia ka korphiw miet 7 baje mynmiet haduh 5 baje mynstep, katei ka korphiw miet kan treikam naduh 21 tarik tad haduh ban da pynbna da kumwei pat.
Kumta la maham pyrshah ia kino kino ki kam ba ialum briew, la ka long ia ki jingialang paidbah, ki jaka mane blei bad ka jingwan jong ki briew ba nabar sha ka jylla.
Haba iadei bad ki dukan marbam, la ailad ba kin plie ha ka sngi nyngkong, sngi balang bad sngi thohdieng, kiba kynthup ia ki dukan ba die ia ki tiar rep bad ki jingbam mrad, kata naduh ka por 9 baje mynstep haduh 4 baje janmiet bad kidei ban long ki dukan kiba la aibor da u Rangbah Shnong ryngkat bad u Block Development Officer, katba ia ki dukan bam kum ki Restaurant bad kiwei la ailad tang ban song bad rah.
Kiwei ki dukan kum ki hardware, ki dukan mobile, dukan jain, ki jaka shna kali bad kiwei kiwei la ailad ba kin plie ha ka sngi Ba-ar bad sngi palei jong ka taiew, kata lyngba ka jingbit na u Rangbah Shnong bad BDO.
Ka District Magistrate, ka la maham ia ki paidbah ba kim dei ban mih sha surok khlem kam bad ki kali ki dei ban don ia ki car pass bad kino kino kiba leh pyrshah kin shah pynshitom beit katkum ki kyndon ain.
Phi don ban ong eiei?