Dang iai neh ki shnong ba hap hapoh Pynursla CVS ha ka thup Border Areas : SSSN

Shillong: Hadien ba la don ki khana hamsaia kaba la pynkulmar jingmut ia ki paid nongshong shnong ka thaiñ Ri War Mihngi (Pynursla) ba hap hapoh Pynursla Civil Sub Division (Pynursla Constituency) bad kumjuh ha ka jingpeit u Border Area Development Officer Pynursla ba la weng noh na ka thup Border Area ia kiba bun tylli ki shnong ba kham sha neng naduh ba la plie ia ka Pynursla Civil Sub Division ha u 2017 ka dei tang ka khana khlieng tyngab ka bym shisha.

Ka la don ka khubor ba saphriang kaba ong ba ki shnong kiba hap ha ka thup Border Areas ki long tang na Pongtung sharum bad ruh na Wahkdait sharum kaba mut ba kito ki shnong kiba don shaneng na kitei ki shnong kim lah shuh ban ioh jingmyntoi lyngba ka Border Areas Devlopment scheme bapher bapher kumjuh ki samla pule kim lah shuh ban dang apply ia ki Border Area Scholarship. Kane ka khubor ka la pynlong ia kiba bun ki samla pule ba ju apply ia ka Border Area Scholarship ban sangeh apply na ka daw ka jing saphriang kane ka khubor lamler.

Hadien ka jingsngew khia ia kane bad ban wad ia ka jingshisha ka Seng Samla Shnong Nongsder ka la pan da ka RTI na ka Ophis u BADO ka Pynursla ban ioh ia ka thup ki shnong ba hap Border Areas.

Katkum ka jubab ba la ioh lyngba ka RTI kaba don ia u reference number NO.PBA/SDO(C) 2018-19/260/06 bad kaba la ioh haka 18tarik August.2020 ka pyni ba baroh ki shnong ba la ju hap ha ka thup Border Areas Katkum ka Notification ba la pynbna ha u 2015 ki dang iai neh kumjuh watla ka Civil Sub Division ka la don ha Pynursla. Ki shnong kiba hap ha ka jing jngai kaba 0-10 Km ki don haduh 84 tylli ba kynthup naduh Borhill, Umniuh ter ter haduh Dewsaw. Kiba hap ha ka jing jngai ba 10-20km ki don haduh 50 tylli ba kynthup ia ka Dewsaw Pathaw ter ter haduh Mawkhap. Ba hap ha ka jing jngai ba 20-50 Km ba kynthup ia ka Iewrynghep, Mawkynrew ter ter haduh Wahmawlein.

Kumta ka Seng da kane ka kyrwoh ka pyntip ia ki khun Samla kiba hap ha kine ki shnong ba la kdew haneng ba ki dang don hok ban apply ia ka Border Area Scholarship bad kumjuh ki Dorbar Shnong ki dang don hok ban leit wad ia ki Scheme pynroi na ka Department Border Areas Development.

Kyntang ia wai ka Seng ka kyntu ia ki paidbah ban long kiba husiar bad kiar ban pynphriang ia ki khubor bym shisha khlem da tih bniah naduh tynrai. Ia kane ka kyrwoh la phah da u Samla Pyndapborlang Nongrum Publicity Secretary Seng Samla Shnong Nongsder.