Dang ia kren ka UDP bad ka kong Fenela, ban ialeh na Nongstoiñ

Shillong, 30 Risaw:
Ka UDP kaba dei ka dawbah kaba la pynlong ia ka kong Fenela L Nonglait ban shah beh seng na ka HSPDP, namar ka jingmih madan jong ka ban ia donlang ha ka rynsah jingialang paidbah jong u kyrtong katei ka seng u bah Paul Lyngdoh ha Motphran; mynta ka pyrshang ban siew kylliang ia ka kong Fenela da kaba tyrwa ba kan ia khun noh kum ka kyrtong jong katei ka seng na Nongstoiñ.
Kham mynshuwa ka UDP ka la sngap jar ha kaba ia dei bad ka elekshon shiteng samoi ha Nongstoiñ ha kaba ki lad khubor ki la iathuh ba ka ap ba lada jia ba ki pyrsa u Maieid Hoping ki ioh tiket, kan ym buh kyrtong bad lada jia pat ba da kiwei pat ki briew ka HSPDP kin ioh tiket kan buh kyrtong. Ki tyllong khubor na ka seng UDP, la ong ba mynta ka jingiakren hapdeng katei ka seng bad ka kong Fenela ka dang iaid shakhmat.
Hynrei la ong pat ba ka UDP ka dang pyrshang ruh ban wad ia ki lad jingiakren bad u Dr. Adviser Pariong ruh, uba la thikna ba un shah pynduh tiket na ka seng Congress ha kane ka elekshon shiteng samoi. Haduh mynta ki lad khubor na ka seng UDP kim pat shym la pynthikna kaei ka jingiakren kaba mih hapdeng jong ki bad ka kong Fenela.