Dang bunkam u Amit Shah, yn kynduh hadien ka RD halor ka ILP, ong u Conrad

Shillong: U Myntri Rang bah ka Meghalaya, u Conrad K Sangma u la iathuh ba ka jingiakynduh bad u Myntri Kam pohïing ka sorkar India, u Amit Shah ka lah ban long hadien ka jingrakhe ia ka Republic Day (RD), ban iakren ia ka rai jong ka jylla ban dawa pyntreikam ia ka ILP.

“Nga la iakren ia u Amit Shah la ar sien bad u la pyntip ba un sa khot hadien kane ka taiew namar ba dang bun kam na ka bynta ka Republic Day”, la ong u Conrad haba kren mynta ka sngi.
U Myntri Rangbah u la ong ba ka jylla ka dang ap ia kata ka por ban iakynduh bad un dang iakren beit ia kane ka mat bad u Myntri ka sorkar India, da kaba u la iathuh ruh ba u Shah u sngewthuh ia ka long ka man ha ka jylla na ka bynta kane ka jingdawa bad pynpaw ka jingkyrmen ban iakynduh noh kloi katba lah.
Kumba ka long haduh mynta, ki sengbhalang, ki paidbah ki dang ap kmong lano ban ioh ia ka jubab na ka sorkar pdeng halor ka jingdawa ban pyntreikam noh da ka ILP ha ka jylla hadien ba ka iing dorbar ka la rai ha u bnai ba la dep.
Hynrei haduh mynta ka sorkar jylla kam pat ioh satia ban leit iakynduh ia u myntri kam pohiing ka ri bad kiwei ki nongialam ban iakren halor kane ka jingdawa ILP hadien ba ka sorkar pdeng ka la pyntreikam ia ka Citizenship Amendment Ac 2019, kaba la pynkhih pyrthei ha ka rid a ka jingpyrshah ki paidbah bad ki sengbhalang bapher bapher ha kane ka jylla bad ha kiwei ki bynta ka ri.