Dang bteng ka jingthmu ban buh ktem BSF ha Nongstoin

Nongstoiñ, 2 Rymphang:
Ka jingthmu ban buh ia ka kut jong ki BSF hapoh West Khasi Hills District haduh kine ki sngi ka dang iai bteng, ha kaba ki bor pyniaid District jong ka West Khasi Hills District dang shen ki dang dep ban pynlong ia ka jingialang kaba kyrkieh hapoh DC ophis Nongstoin ban iakren halor katei ka bynta.
Katkum ka jingioh lum jingtip u nongthoh khubor, la ong, ba ia katei ka ktem BSF, la thmu biang ban buh ha kawei na ki jaka kaba don marjan bad ka surok bah Nongstoin Bypass kaba hap hapoh u pud u sam jong ka shnong Pyndengrei.
Shuh shuh la ioh jingtip ruh ba ia katei ka jaka ba la thmu ban wan buh ia katei ka ktem BSF, la wan ruh ban jurip da u Myntri ka kam poh iing u bah HDR Lyngdoh ha ka 26 tarik jong u Kyllalyngkot ka sngi ba u wan ban pynher ia ka lama lai rong jong ka Ri India ha Nongstoin ban rakhe ia ka Republic Day.
Katei ka jingthmu ban buh ktem BSF ha katei ka jaka, ka la sdang ban pur sted bha ha kaba ka la poi ruh shaduh ki tyndong shkor jong ka seng Khasi Student Union West Khasi Hills District kaba dei ruh kawei na ki sengbhalang kaba la ju iai pyrshah ia kaba kum katei ka jingthmu naduh ki por kiba kham mynshwa.
U nongthoh khubor u la ioh lad ruh ban iakren bad u samla John Fisher Nongsiang President ka KSU West Khasi Hills District, ban kylli aiu u dong ban ong halor katei ka jingthmu bad na ka liang jong u tei u nongialam u la ong “Lada ki bor District ki buh da ki pulit lane ki battalion ngi kloi ban pdiang hynrei ia katei ka camp BSF da lei lei, ngin nym lah ban pdiang bad ngin ieng ruh ban iai pyrshah jur”.
Shuh shuh u tei u nongialam u la ong ruh ba ka seng hi baroh kawei ka pyrshah jur ia katei ka jingthmu ban wah buh ktem BSF hapoh West Khasi Hills District, namar ba ka seng kam kwah ba katei ka thain kan kylla long kum ka jaka shah thombor ia ki kynthei ki khynnah bad u la ong biang lada ki bor District bad ka sorkar ki kwah ban buh ia katei ka ktem BSF, ki lah ban buh sha Shillong kaba dei ka ophis heh duh jong kitei ki shipai bad balei ki hap ban wanbuh shaduh Nongstoin.
Utei u nongialam u la ong ruh ba ka seng KSU WKHD kan sa khot ban pynlong da ka jingialang kaba heh na ka bynta ban pyrshah jur ia katei ka jingthmu bad u la ong ruh ba ka seng kan sa khot bad pan jingkyrshan lang ruh na baroh ki bor pyniaid shnong kiba hap hapoh katei ka jaka ba la thmu ban buh ia katei ka ktem BSF.