Dang ap pisa ban shna iing sha nongkyndong: Kong Ampareen

Shillong, 18 Lber:
Ka myntri kam pyn roi sor ka Kong Ampareen Lyngdoh ka la ong ba ka sorkar ka dang ap ban ioh ia ka jingmang pisa na ka bynta ban shna iing ia kiba duk sha nongkyndong lyngba ka Meghalaya Hou sing Scheme.
“Ngi la dep phah ia ka jingtyrwa ban ai pisa na ka bynta kane ka skhim jong une u snem mang pisa”, la ong ka Kong Lyngdoh haba jubab ia ka jingkylli mynta ka sngi, hapoh ka iing dorbar.
Ka la ong ba ki deputy commissioner kin shim ia ka kam ban jied ia ki briew kiba dei hok ban ioh bynta na kane ka skhim.
“Ki MLA ki lah ban tyrwa ia ki kyrteng jong ki briew kiba lah ban ioh bynta na kane ka skhim sha ka Committee kaban khlieh da u Deputy Commissioner. Kane ka komiti kan pyrkhat bad kan jed ia ki briew kiba dei hok ban ioh bynta na kane ka skhim” ka la ong.
Ha kajuh ka por, ka myntri ka la ong ba ka jingpyntreikam ia ka Rural Housing Scheme la pynsangeh noh naduh u snem 2010-2011.
“Ngi la sangeh ban pyntreikam ia kane ka skhim namar ba kam long kaba hun”, la ong ka kong Lyngdoh bad ka la bynrap ba ka jingsam tin (CGI) kam lah satia ban ai jaka sah kaba biang ia ki briew baduk sha jaka nongkyndong.
“Ngin tei ia ka iing da kaba khot tender ban leh da ki kontraktor ban shna ia ki iing ha kane ka skhim ba thymmai”, ka la ong ka Kong Ampareen.