Dang ap na ka sorkar pdeng, ban pynkhuid wah Umkhrah

Shillong, 13 Nailar:
Ka sorkar jylla ka dang ap sah ia ka jingai ktien jong ka sorkar pdeng ban pynkhuid ia ka Wah Umkhrah. Haba kren bad u Symbud Myntri Rang bah ba peit ia ka tnad Water Resources u Bah Rowel Lyngdoh u la ong ba ka sorkar jylla ka la ap na ka sorkar pdeng ba kan ai jingtip halor ka DPR ba la pan ban pynkhuid ia ka wah Umkhrah.
“Ngi la dep phah naduh mynshem snem hynrei ka sorkar pdeng kam pat ai jingtip eiei halor kane haduh mynta”, la ong u Bah Rowel.
Lah ban ong ba ka jingpynkhuid ia ka wah Umkhrah ka dei ka mat kaba iakren bha ha khyn diat snem bad kane ka mat ikumba kan pjah noh mynta.
Kham mynshwa ka ICARE ka la pynlong ia ka kampein halor kumno ban pynkhuid ia ka Wah Umkhrah. Ha kane ka jingpynkhuid, la iashim bynta lang da ka Synjuk ki Rangbah Shnong (SRS), ka Khasi Students Union (KSU), Federation of Khasi Jaintia and Garo People (FKJGP), ka Synjuk ki Seng Samla Shnong (SSSS), ka Lympung Ki Seng Kynthei (LKSK), ka Meghalaya Women’s Alliance (MWA) bad ki dkhot na ka Shillong Cantonment Board.
Lah ban kdew ba ka EC barim hapoh ka jingialam u Bah Pynshngain Syiem ka la mang T.50 lak na ka bynta ban pynkhuid ia kane ka wah ha kane ka sienjam ba nyngkong.
Ha ka por sdang ka ishongshit bha hynrei kane ka jingthmu ikumba ka la pjah noh bad kam shym la mih pyrthei shuh ha ka jingiakren wat ha ka liang ka sorkar jylla ne ka district council.