Nongpoh: U CEM ka Khasi Hills Autonomous District Council, u Bah Teinwell Dkhar, ha ryngkat arngut ki MLA kiba kynthup ia u Bah SK Sun, u Bah Gigur Myrthong lem bad ki katto katne ngut ki MDC kiba kynthup ia u Bah Titos Chyne, u Bah RR Kharbuki, u Bah Victor Ranee lem bad kiwei, myn hynnin ka sngi ki la hiar jurip ia ka iing u Bah Micheal Warjri, kaba la shah pynpra noh dang shen ha ki paidbah jong katei ka thain.
U CEM ka KHADC u Bah Teinwell Dkhar ha ba leit jngoh ia ka shnong Balakhwa ha ka sngi Thohdieng: Rupang
Haba leit ban jurip ia katei ka jaka, kaba la iadonlang ruh u Pa’iem Patrick Syiemiong, Syiem ka Hima Nongspung, ki nongialam ka HNYF, ki bor Pulit na Ri Bhoi, ki la leit ruh ban jurip ia ka jingkieng kaba la tei lyngba ka skim PMGSY, kaba dei ruh ka dawbah kaba la pynlong ia ka huri hura ha katei ka thain.
Haba kren sha ki lad pathaikhubor, hadien katei ka jingjurip, u Bah Teinwell Dkhar lem bad kitei ki MDC, ki la pynrem jur halor katei ka jingjia bad kiba la ong ruh ba kum kitei ki jingjia ki dei ki bym lah ban pdiang da lei lei ruh em.
Halor jong katei ka jingjia, u CEM lem bad kitei ki MDC kiba la synranglang ha kane ka sngi, ki la shim ia ka rai ban kin sa shong pyrkhat la sngi Nyngkong, na ka bynta ban shim ia ka rai.
U la ong ruh ba Council hi kan sa shong pyrkhat bha bad ban leit kynduh ia ka sorkar jylla, na ka bynta ban iakren bha halor jong katei ka phang bad khamtam eh haba iadei bad ban kyntu ia ka sorkar jylla ba ka dei ban shimkhia ban pyllait noh ia u Bah Micheal Warjri na kti ki pulit ka Assam, namar kat haduh mynta u Bah Micheal Warjri u dang don ha kti ki Pulit ka Assam.
Ha kane ka jingleit jurip, u CEM lem bad kitei ki MLA bad MDC, ki la sakhi da la ki jong ki khmat halor ka jingdonkam ka Police Outpost ha katei ka thain. Kumta halor katei ka Police Outpost ki la rai ban shimkhia noh mardor ba ka dei ban don ha katei ka thain.
Katba na ka liang u Pa’iem Patrik Syiemiong, u la kren shai ba ka daw hi baroh kaba la wanrah ia katei ka jingjia, ka dei halor ka surok PMGSY kaba la pyntrei da ka sorkar Assam ha katei ka shnong, utei u Syiem, u la pynpaw shai ruh ba katei ka jaka kaba la wan shna surok da ka sorkar Assam, ka dei ka jaka kaba dang hap hapoh Meghalaya bad kaba hap hapoh ka Hima Nongspung.
Na ka liang ka HNYF ruh, kaba la kren da u Bah Marcus Marten bad u Bah KS Rani, ka la pynrem jur halor katei ka jingjia bad ki la dawa ia ka sorkar ba ka dei ban shimkhia, kata ka long naduh ban pynbeit noh ia u pud u sam, ka Police Outpost bad ban pyllait noh ia u Bah Micheal Warjri na kti ki Pulit ka Assam.
Phi don ban ong eiei?