Dait thah ka iew thep kyrteng ki kyrtong, kynjah ka DC ophis

Shillong,5 Rymphang:
Kumba long manla ka elekshon tang shu poi ka sngi sdang thep kyr teng jong ki kyrtong ka DC ophis ha Shillong, ka shongshit puk, hynrei mynta ka sngi katei ka ophis ka la dait thah jar jar ha kaba haduh mynta ym pat don uwei ruh u kyrtong uba la thep kyrteng lait noh tang katto katne ngut kiba la shu wan shim phom bad ban pynbiang lypa ia ki kot ki sla. Haba ia kren bad ki katto katne ngut ki kyrtong kiba la poi sha katei ka ophis mynta ka sngi , ki la pynpaw ba ka daw ka jingbym lah ban pynbiang bad ban pyndep ia ka jingthep kyrteng mynta ka sngi ka dei namarba ba la pynbna ia ka notification mynta hi ka sngi.. Katto katne ngut ki kyrtong kiba la poi sha DC ophis mynta ka sngi ki long u Bah James Ban Basaiawmoit, u kyrtong ka KHNAM na Mawkhar Konstitwensi, u Bah Jansing Tynsong ka Congress na Lyngkyrdem-Laitkroh konstitwensi bad u bah Rocky Hek ka Congress na pynthor-umkhrah konstitwensi.
Haba la ia kren pat bad katto katne ngut ki kyrtong kiba la poi bad ki bym shym la poi sha DC ophis mynta ka sngi, la sngewthuh ba ka jingthep kyrteng ki kyrtong ki seng bapher bapher kan thnam bha lashai ka 7 tarik u rymphang. Katkum ka jingtip ba la ioh lum haduh mynta ym pat don kyrtong kiba la dep thep kyrteng. Shuh shuh ha kaba ia dei bad ka jingialap elekshon ha kane ka MDC, la iathuh ba ka tnad elekshon ka sorkar jylla kan shah ban sdang naduh ka 13 tarik mynta u bnai.