Dait ksew naphang ha Nongtalang

Shillong,21 Nailar:
Ar lai sngi myn shuwa ka la don ka jing shah dait ksew ha Nongta lang ha kaba ki ksew lamwir ki la dait naphang ia ki khynnah rit ha katei ka shnong. Katei ka jingshah ksew ki khynnah ka la bteng haduh mynta ka sngi ha kaba la iathuh ba ki don kumba 7 ngut ki khynnah rit kiba la shah dait ksew hynrei uwei na ki u khynnah shynrang ba dang 8 snem karta u la kham shitom bad la leit rah sha ka Hospital ha jowai ban shah injek. Haba ia kren bad u Rupang ki nongshong shnong jong katei ka shnong ki la ong ba ym lah shuh ban ithuh kino ki ksew lamwir kino kiba biang naba mynta ka la don sa ka jingiadait ia wiar para ksew , bad ki nongshong shnong ki la sdang ban shu pyniap naphang beit kat ki ksew ki bym don ia u jingdeng ryndang, bad la iathuh ba katei ka la jia ha manla ki dong ha kaba ha manla ki dong haduh ba thoh ia kane ka khubor ka jingthwet ban pyniap ksew ka dang iaid.