Nongpoh, 22 Rymphang: Bun tylli ki trok kiba iaid ha surokbah NH-6 ha Ri Bhoi bad kiba pyndonkam ban iaid ha ka liang ka mon jong ka surokbah NH-6, mynta ka sngi ki la shah dain kuna ha ki Pulit ka Ri Bhoi, ha kaba ka pisa kaba ki Pulit ki dei ban ioh ka long T. 18 hajar, hynrei ki la ioh ban lum tang T. 5 hajar bad T. 13 hajar pat kim pat ioh.
Ia katei ka jingbat naphang ia ki trok kiba iaid na ka liang ka mon, da kaba ailad pat ia kiwei ki kali ba kin iaid shakhmat na ka liang ka diang, ki Pulit ki la pynlong ha surokbah NH-6 hajan ka shnong Saiden, ha kaba ki Pulit nalor kaba ki la dain kuna na kitei ki trok, ki la ai jinghikai ruh ia kitei ki nongniah trok, ba nangne shakhmat kim dei shuh ban iaid na ka liang ka mon haba ki iaid hapoh ka surokbah NH-6.
Lah ruh ban kdew hangne, dang hynnin ka sngi, ki Pulit pyniaid kali ha Ri Bhoi, ki la buh ia ka jingmaham ia baroh ki nongniah trok, ba haba ki iaid lyngba ka surokbah NH-6 ha Ri Bhoi, ki dei ban iaid beit ha ka liang ka diang jong ka surok bad ba ki dei ban ailad na ka liang ka mon ia kiwei ki kali kiba kwah ban iaid shakhmat.
Ka nongrim kaba la pynlong ia ki Pulit Ri Bhoi, ba ki bthah ia baroh ki nongniah trok ba ki dei ban iaid beit na ka liang ka mon hapoh ka surokbah NH-6, ka dei hadien ba ki la lap ba la don shibun ki jingjia aksiden bad kiba wanrah ruh ia ki jingjia ba sngewsih, ha kaba kata ka dei tang namar ba ki kali kiba kwah ban iaid shakhmat, ki iaid na ka liang ka diang jong ka surok.
Ki Pulit Ri Bhoi, kin sa dang iai pynlong ia kaba kum katei ka jingpeit pyrman ia ki trok kiba iaid na ka liang ka mon jong ka surok bad lada ki lap, kaba mut ba kin dain kuna beit ia kito ki trok kiba iaid ha ka liang ka mon jong ka surok.
Phi don ban ong eiei?