Da u synniang ba mar T.500, tei jingkieng ha khap Meghalaya – Assam

Nongpoh:Ka Jingkieng kaba la tei da kaba noh synniang hapdeng ki briew ka Meghalaya-Assam, kaba don ha shnong Rongsahep kaba don ha khappud ka Meghalaya-Assam, la ioh ban plie paidbah noh myn hynnin ka sngi, ia kaba la leit ban plie da u Bah Mayrald Born Syiem, MLA ka Nongpoh Constituency, ha ryngkat ka jingdon u Bah Balajied Ranee, MDC Nongpoh lem bad kiwei de ki nongialam shnong jong katei ka thain.

Ia katei ka jingkieng kaba la ioh ban plie paidbah myn hynnin ka sngi, la tei da ki briew kiba sah ha katei ka thain khappud ka Meghalaya-Assam, ha kaba kitei ki paidbah na Meghalaya-Assam, ki la ia sei pisa mar T. 500 spah shi iing na ka bynta ban tei ia katei ka Jingkieng, khnang ban suk ka leit ka wan hapdeng kitei ki briew kiba sah kitei kiba sah ha khappud.