Da u Prah ngin peh ïa ka jaboh ka Saiñ pyrthei ha Meghalaya, ong U bah Ardent

Shillong:Ka seng saiñ pyrthei kaba thymmai ka Voice of the People Party (VPP) kaba la dep ban register bad ka Election Commission jong ka Ri India ka la ïoh ïa ka shap jong ka da ka dur jong u Prah ïa kaba la pyllait paidbah ha Smit ha ka sngi Saitjaiñ da u President ka seng u Bah Ardent Basaïawmoit ha ka jingïadon lang ki nongkyrshan ka party.

Ha kane ka sngi ki nongkyrshan ka party VPP ki la ïapoi na kylleng ban ïa sakhi lang ha kane ka sngi ba la pynlait paidbah ïa ka shap jong ka party, palat hajar ki nongkyrshan kila ïa poi lang sha katei ka jingïalang ha Smit, ryngkat ka jingïadonlang ki nongkitkam ka party.

Hadien ba la pynlait paidbah ïa ka shap ki nongïalam jong ka party kila pynlong ïa ka jingpyrta kum ka dak jong ka jingkmen ha kaba baroh ki la ïa ong ha u Prah, bad u President ka seng u Bah Ardent u la ong ba kin pynkhuid ïa ka jaboh ka Saiñ pyrthei ha Meghalaya da kaba kaweh bad peh da u Prah.