“Da u nong ai ktien ba thikna ia ka UDP” ong ka Umsning

Shillong, 25 Iaiong:
Ka UDP Umsning Circle ka la pyntip ba katei ka seng ka la shim rai ha ka jingialang kaba la long ha ka 21 tarik mynta u bnai ban kyrshan ia ka rai u MDC jong ka u bah Donkupar Sumer ban nangkyrshan ia ka Executive Committee ka PDF kaba ialam da u bah Pynshngaiñ N Syiem katba ki jingkynnoh bamsap kim pat shai kdar hakhmat ka aiñ.
Ka jingthoh ba la soi da u Secretary UDP Umsning u bah Bias Sylliang, ka la kyrpad ia u President/Secretary rangbah jong ka Party ba kan bishar bniah biang ia ka rai jong ka CEC kaba la long ha ka 17 tarik mynta u bnai. Ha kajuh ka por ka jingthoh ka la kyrpad ruh ia ka Central Body ba ka dei ban buh noh ia u nongaiktien ba thikna jong katei ka seng khnang ba ka khubor kan nym iapher kawei na kawei pat. Ha kawei pat ka liang ka la pyntip ba ka la jied ia ki nongkitkam thymmai jong ka Circle ha katei hi ka sngi ka 21 tarik u iaiong ha kaba ia ka kam President la jied ia u bah Donkupar Sumer, Working President bah Jop Shabong Vice President Shanbor Ranee, Joint Secretary Emri Kurbah, Working President Youth Wing Dewing Khymdeit.