Da u ‘Mark’ bad ka ‘Markor’ yn khring ka Election Commission

Shillong, 17 Jylliew:  Ban khring ia ki samla ban sa dap 18 snem ban rung kyrteng kum ki nongthep vote, ka tnad pyniaid elekshon ka Meghalaya  ka la pynmih da ka dur bula jong u khla, uban tip kum u ‘Mark’ bad ka ‘Markor’.
Ia kine la pynlait mynta ka sngi ha ka jingpynlait paidbah ia ka Systematic Voters’ Education and Electoral Participation (SVEEP) hapoh ka National Electoral Rolls Purification (NERP). Ka jingthmu ba kongsan kane ka long ban khring ia ki paidbah ban rung kum ki nongthep vote ha kane ka jylla khamtam ia ki samla ban sa kot ka rta sha ka 18 snem ha u 2017.
Ka jingjied ia u khla kum u Bula ban pynphriang ia ka khubor pynrung kyrteng nongthep vote, ka long namar ba u dei u mrad ka jylla uban pynphriang ia ka khubor sha baroh ki 11 tylli ki district ka jylla.
Ka samla Dolyne Kharbhih na Nongsder ka Ri-Bhoi kaba lah ban kiew ia u lum Mangkashang ne Mount Everest la jied ba kan long ka nongpynphriang khubor ia ka SVEEP.
Ha ka jingshisha ia kane ka kam, la dei ban pyndep ha u bnai Nailar ban wan jong mynta u snem hynrei ha kane ka jylla namar ka jingdon ka elekshon shiteng samoi ha Tura, la pynjlan sha u bnai Nailur, la ong u  Chief electoral officer (CEO) Bah Frederick R Kharkongor  hadien ba la pynlait paidbah ia kane ka SVEEP.
Na ka bynta ban pynlong ia kane ka thong kaba jop, ka tnad elekshon ka la thung  palat 2500 ngut ki booth level officers (BLOs) kiban leit sha man ki jaka thep vote ban pynrung kyrteng ia ki briew  kiba la biang ka rta bad ban pynbeit ia kano kano ka jingbakla kum ka kyrteng, rta, jaka sah bad kiwei de.
U Bah Kharkongor u la ong ba ka Election Commission of India (ECI) ka la pyntreikam da ka  software kaban lap ia kano kano ka jingbakla ne jingmih kyrteng bun jaka jong uwei u briew.
U la ong ba ka tnad elekshon ka la buh thong ban pynrung palat 1.78 lak ngut ki nongthep vote ha kane ka jingiaid kynthup 82,668 ngut ki nongthep vote.
Haduh mynta, ki la don haduh 16.59 lak kiba la dep pynrung kyrteng kum ki nongthep vote bad ki dang sah sa 1.28 lak ki bym pat pynrung kyrteng ha ka jylla.