Shillong:Ka Raij Namdong hapoh ka jingialam jong u ma Isidorius Pakma mynta ka la pynkhreh ban sei ia u kyrtong u ban ia khun ha ka election MLA 2023 ryngkat bad ka thong ban pynurlong ia ki jingdonkam u paidbah ka 1st Nartiang Assembly Constituency.
La ong ba haduh kine ki sngi kam pat lah ban kylla dur ha kaba ia dei bad ki jingeh u paidbah nongshong shnong khamtam u duk u rangli, wat la une U MLA, uba mynta u la pyrshang ban iarap ia ki surok, hynrei dang don ki shnong kiba dang shah iehbein haduh kine ki sngi bad lait na ka surok kiba bun ki jingdonkam jong ka constituency kiba ha khmat eh kiba la buh ia ki briew ka constituency ha ka jingeh.
Ha ka pule puthi, ym don ki jaka pule kiba biang lait noh ki school private (Mission) kita ruh tang Secondary bad ki Government school kiba bun ki dei ki primary school kiba la long kum ki sem sniang sem masi namar bym ju don ka jing maramot naduh ba la seng ia ki.
Ha ka koit ka khiah kum ka nuksa ka Namdong PHC kaba la ioh ia ka building naduh u snem 2012, hynrei haduh kine ki sngi um pat lah ban pynurlong ia ka jingdonkam u paidbah ka shim por mynta haduh 9 snem tang ban plie.
Ka jingbymlah ban pynurlong ia ka Namdong C&RD Block kaba la buh thong naduh u snem 2013, hynrei haduh mynta ym pat lah ban leh eiei, na ka bynta ban iarap ban pynsuk ia u duk u suk kumba long lem sha kiwei ki jaka ka jngbud dien jong ki nongialam shnong ka shu long kamkai namar ba ka sorkar kam iohi ia ki jingeh u paidbah.
Ka jingeh ki paidbah khappud na kawei ka sngi sha kawei ka sngi ki briew, ki shah pynshitom bad pynngat ha ki kyndon ba bun jait ryngkat bad ka jingpynthut ia ka jingtrei jingktah jong ki lyngba ki bor jong ka ain na Assam ka jingthaw ia ki battalion camp da ka sorkar Assam shapoh u pud u sam ka Jylla Meghalaya, ka jingpyntrei surok jubor hapoh u pud u sam ka jylla da ka Assam hynrei na ka liang ka sorkar bad ki nongmih khmat ki shu peit kai ia kane haduh mynta.
“Halor kine ki mat bad kiwei ki jingeh ki paidbah ngin sei sa u wei u rangkynsai na ka thain jong ngi ban mih khmat sha assembly kumba ngi la sei ia u MDC jong ngi uba mynta uba don ka jingkitkhlieh ia ka imlang sahlang ha i bor iba rit hapoh ka District Council, bad na ka bynta u candidate MLA ngin pynieng pat sa u wei” ong ka khubor ba la pyllait da u Secretary ka Raij Namdong bah Isidorius Pakma.
Kaba dei eh kata,donbok ba ngin iatylli ha kawei ka jingmut hapoh ka raid namdong,lada ki paidbah ki sngewthuh ym donkam ban da batai bniah iaki plan ryngbah, sngewbha iatylli tang shisien phin iohi ka jingkylla hapoh ka thain namdong.