Da U bah Paul Lyngdoh, lah ban pyniakhun MP ka UDP

Shillong, 18 Risaw:
Dang shen na ka liang jong ka Meghalaya Pradesh Congress Committee (MPCC), ha ka jingialang kaba iadei bad ka ilekshon MP, kam shym la shim rai satia ban phah tang uwei u kyrtong MP sha ka All India Congress Committee (AICC), hynrei ka la phah ia ki kyrteng jong baroh 4 ngut ki kyrtong kiba la pan tiket bad kiba kwah ban iakhun ia ka ilekshon MP, 2014, kata u bah Vincent H Pala, Bah John Kharshiing, Bah OL Nongtdu bad u bah Charles Pyngrope.
Haba u nongaikhubor u la pyrshang ban wad jingtip halor ki seng riewlum la kin pynieng kyrtong ne em ha kane ka ilekshon MP ban wan, la sngewthuh ba na ka liang jong ka UDP ka la shim rai ban iakhun ia kane ka ilekshon MP, hynrei ym pat lah ban ioh jingtip thikna la ka HSPDP kaba dei kawei pat ka seng riewlum ba ar ha ka jingbun ki MLA kan iakhun ne em ha kane ka ilekshon MP ban wan.
Haba pyrshang ban wad jingtip halor ka UDP haduh mynta ym pat lah ban pynthikna iano kan pyniakhun, hynrei na ki khubor kiba iajan bad ka UDP la iathuh ba ka UDP kan iakhun beit bad ka lah ruh ban pyniakhun da u bah Paul Lyngdoh, MLA uba dei ruh uwei na ki nongialam barim jong ka Khasi Student Union (KSU).
Haba pyrshang ban wad jingtip halor ka party NPP la ioh jingtip ba na Garo Hills ka la thikna ban iakhun namar ka MP kaba mynta ka dei ka khun jong u Purno A Sangma ka Agatha Sangma kaba dei na ka party National Congress Party (NCP) bad la sngewthuh shai ba, lada ka Agatha Sangma kan iakhun biang ia kane ka ilekshon MP ban wan kan nym iakhun shuh na ka party NCP, hynrei kan iakhun noh na ka party NPP. Hynrei haba phai na sha ka Shillong Seat haduh mynta la ong ba ka NPP kam pat shim rai la kan pyniakhun ne em bad kiwei pat ki khubor ki ong ba, ka lah ban kyrshan ia ka UDP.
Kumta haduh mynta ym pat lah ban pynthikna kiei ki kyrtong ki ban iakhun na ka Shillong Seat namar ka Congress ruh kan hap ban ap ia ka rai na ka Delhi la kan ai tiket ia u bah Vincent H Pala (MP), Bah John Kharshiing, Bah OL Nongtdu lane ia u bah Charles Pyngrope bad kiwei pat ki party ruh haduh mynta kim pat pynbna satia ia ki kyrtong ki ban iakhun ia ka ilekshon MP ban wan.