DA PYNSHONGNIA

P.B.S
[ba bteng] Ym ju kham ioh shongthait namar ba ka biang ka dukan. La wan ka nohphai sngi u shu dihsha tuk tak tang ban nym thngan. Tang dep pat dep lutlah da wan ki customer. Kumne ka shait long man ka sngi. Dei tang ha ka por janmiet ba u kham ioh por khyndiat ban shongthait.

Katba u dang khein jingkhein ha mobile khliak u kum kynmaw ba u hap ban wai da ka iing kaba kham heh la kumno kumno lai ne saw kamra namar ba hap sah lang bad ka nongtrei. U pyrkhat ba lah khia ka bai wai namar kan poi beit sha ka Rs 6000/- ne 7000/- shi bnai. U shu tngen noh namar ka lok ka treikam sorkar
“Bah, phi khang katno baje?” la kylli uwei u briew uba dang i riew thymmai
“Nga khang 7 baje bah” jubab u Marchborn
“Phi mut ban shim mar?” bniah u Marchborn
“Hooid, nga mut kumta kein” jubab uta u briew
“Phi buh dukan shnong ne bah?” buh jingkylli u Marchborn
“Hooid” la jubab uta u briew
“Kata ka mut phi dang sdang mo ne lah slem ka dukan jong phi?” kylli kwah tip u Marchborn
“Em, dang shen phi. Nga mut ban shim tiar na ki para khasi kein ym shuh na u dkhar” jubab uta u briew
“To ai lypa ka list jong phi” pan u Marchborn.

Haba u la thep kynshew pisa u la dih noh ia ka sha ba la wanrah ka lok. Haba u la dep ka la leit buh noh sha kamra buh um ban khlieng noh. U Marchborn u dang pynbeit bha ia ka pisa ha la ki jong ki jong ki lut.
“ Kumno kata ka nongtrei ka la thikna ban wan?” kylli ka lok
“Yn sa ioh jingtip ha kine ki sngi ban wan ne shwa ban kut une u snem” jubab u lok
“Ni jynjar mo kane ka kam wad nongtrei” kren lam khnium ka lok
“Ba ong te” ong u lok
“Kaba ngiah eh ka dei kaba ki phet noh tang shipor. Ka lah shu long kumba wan mad ja ne mad ia ka sor. Ka leit long kumta ruh dei namar kam don ka jingpynshong nia kaba biang bad kaba thikna” ong u Marhborn
“Kata kein kaba nga mut ban ong” ong ka lok jong u
Ka shong bylla iing briew ka dei kaba kynrei bha mynta bad kiba buh eh ki dei na ki thain nongkyndong. Ki don kiba shu shong bylla beit kumto hynrei don pat kiba shong iing briew ba ki kwah jingnang jingstad. Ka jingjuh bad ka jingngiah jong ki nongbylla ka shong shibun eh ha ki trai iing. Lada ki bha kata ki la neh da ki snem ne phew snem. Lada ki long mangkariang bad long khniang ka mynsiem ki trei iing tang katta ki la phet khlem da ap shuh ia ka por ba la iakut. Kane ka shait don barabor. Ban mih shabar na la ka iing bad ban don ka jingthrang ban wad jingnang jingstad ki kmie ki kpa ki hap ban sneng ban pyni bad pashat jingmut ha la ka iing lajong ka pher sha bneng sha khyndew bad ka iing ki briew.

“Kata kam leit skul shuh ong kpa?” buh jingkylli ka lok
“Ngam tharai phi ka briew kaba la heh” jubab u lok
“Oh ka biang” ong ka lok
“Tip seh ym pat nang ong la ka biang ne ym biang haba ym pat iohi bad ia kynduh kam” pynphai ktien u Marhborn
“Te kaba la heh lah pher hi kein na kaba kham khynnah. Da kwah leit class pat yn leh kumno?” tynjuh ka lok ia u
“Yn sa kren markhmat bad ka kein. Ka dor ruh ka nang duna” ong u Marchborn
“To lah biang phi ia trei la ka kam ka kam shu ia heh nia hangne khlem myntoi” ong u Marchborn bad u mih shabar bad leit pynjhieh
Ka step ka la wan ha ryngkat ka jingbeh lyer khriat, kine ki la khie ban khreh la ki kam ki duk. Ki la ia mih la ka jong ka jong ka por ban beh sha la ki jingtrei. Tang shu poi ha dukan u Marchborn dum dam u kynrup ia ki kam ki jam. Ki customer ki la nangbun bad u la talain hi ia ka dukan ban pynbit pynbiang ia ki nongthied.
“Phi te phi stet bha ban treikam” la kren iaroh uwei u customer
“Kane ka jait kam ka dawa kumta te phi” ong u Marchborn
“Em phi da kham pher” ban ktien biang uta u customer
“Marwei te phi hap long leilieh hi” jubab u Marchborn bad ka rkhie
Ka por ka la dap 2 baje janmiet. La wan poi ka ja dihsha bad ka sha haba la phah wanrah. U dih kruk krak ioh lap ba wan briew. Hab u kynmaw ia ka jingong uta u customer u sam rkhie marwei marwei da kaba ong ba ka kwah pisa palat ka la paw ha khmat ki briew ruh. Jin lada u buh nongtrei un kham aram hynrei un shu hukum. U shu pyndei ha la ka mynsiem ba haba lah hi ban trei dei ban trei namar un kham ioh saving. Lada pain nongbylla pat ka la khate noh. La wan rung sa 4 ngut ki customer kiba wan shim tiar na u. Dum dam shiphang u la dep song kumba 12 synduk mar bad ka b ai tiar ka la poi Rs 18,000/- hajar. [yn dang bteng]