DA PYNSHONGNIA

P.B.S

[ba bteng] “Me lah ithuh malik?” bniah ka kmie
“Em, ngam pat ithuh. Ka bha ban pynwad ma phi mei khlem pep phin ioh beit namar ba phi ithuh briew” ong u khun
“Da nga wad pat me dei ban iaineh bad pynlang bha namar ka dei ka kam kaba heh jingkamai kumba ong ma me” ong bad kubur ka kmie.

“Katno u daju u kamai shi sngi mei?” kyli kylla u khun
“Nga iohsngew ba kaba rit eh te Rs. 1000/- tam ne duna” iathuh ka kmie
“Ynda lah trei ka iew kan sa batai hi. Me dei tang ban long hok ha kiei kiei baroh. Kito lei ki daju kiba ioh pynhap mar na ki trok kiba wan kit marbam ne kiwei pat ki bym dei ki marbam ka heh bha ka jingioh jong ki bad kaba thikna ruh” ong ka kmie
“Lah jan bad uta u malik phi mei ba ngan ioh hangta” bthah u khun.

“To yn sa ioh hi namar u don u daju khasi uba ju ithuh bha” ong ka kmie
“To ka biang bad ngan sa kylla noh ka jinglong ba phin ym jynjar shuh” kren kut jingmut u khun.
Kiei kiei baroh wei shisien ba la kut jingmut bad pynshongnia kim ju kham lait na ka sohpdung jong ka thong. Ka kmie u tamsneng hadien shi bnai tam ka la ioh iakren bad uwei u na ki daju uba ka ithuh bha ha iew. Uta u daju u la ong ha ka ba un da kylli shwa na u malik ba u treh ne em ban ai kam ia u khun jong ka. Hadien lai sngi uta u daju u la ai ktien ia ka kmie u tamsneng ba u malik jong u un sa ai kam ia u khun jong ka namar ba mynta u dang wad daju da uba kham samla namar uto uwei u la kham tymmen bad ki khun jong u kim kwah shuh ba un bteng ia ka kam naduh u snem thymmai. Kata sa lai taiew shwa ba yn khylliap noh ia u nai khatduh jong u snem.

Ka lyer tlang kaba beh ryngkat ryngkat bad ka lyer lehkmen kum ka Khristmas bad ka New Year ka pynshongshit ia ka iew ka har, ka die ka thied bad ka sur jingrwai Khristmas kiba pynshad kynting ia ki mynsiem jong ki Khristan ban thied sopti thymmai na ka bynta kane, ha ka jingshisha ka jingpynkhreh ia ka dohnud ia ka jingkha thymmai um imat don ei ei hynrei ka khlain eh ka jingpynkhreh ba kynja doh
“Kumno shu jar jar mei katta ruh phim pat ong ei ei ne ia ita i paralok daju ba ithuh ma phi” kylli kwah tip u tamsneng
“Me wat khuslai shuh, pynleh khlain bha la ki dohksah, ki tyrpeng bad thied lypa ka synduk rit ban buh pisa” ong ka kmie bad ka rkhie artat.

“Phi kren kai ne kren shisha mei” bniah bha u khun ba um sngew lah ngeit namar ka kren ia rkhie
“Shisha me, nga rkhie ba nga kmen kein namar ka dei ka kam permanent hynrei ka shong eh ha ka jingtrei jong me” ong ka kmie
“Nga lah ong em mei haba nga la kut jingmut skhem ban kylla noh. Ynnai shuh ki kam bym shoh ler hynrei ngan khmied shakhmat ban ioh ka lawei kaba kmen. Phi mut nga shu khynnah sah ki jingpyrkhat – em te em mei” ong u tamsneng bad ka wiat rymmuin.

Ki jingeh, ka jingduk bad ka jingshah kren bein suki suki ki la shu jahsuki suki na kane ka longiing kum ki umjer kiba shah kjit ha ki kjat sngi. Hadien ka jingioh bylla u tamsneng kane ka longiing ka la idap ibiang bad ka jingialeit bylla ki hynmen ki para jong u ka la wanrah ka lyer thymmai na ka jingud sha ka jingpahuh.
Khuk-khak ka por ka la da iaid shi-snem. U tamsneng u la ioh pynlang pisa shi lak tam. U la ai jingmut ia la ka kmie ban thied auto truck ban phah niah ha la u para. Ka kmie ka la sngewdei bad ka la rai ban thied noh shuwa ban kut u nai Rymphang.
“Ka biang ka jingai jingmut jong me khun” mynjur bad kren ieid ka kmie
“Ynda la dap biang shi lak ngan sa thied sa ka kali second hand ban kamai stand mo mei” ong u tamsneng.

“Kata lei ka biang palat” mynjur ka kmie
“Wat ju ong shuh tamsneng seh mei ba nga sngew lehrain” ong u khun da ka sur kaba jem
“To ngan khot beit noh da ka kyrteng hi kaba la jer lehniam naduh ba dang rit mo” ong ka kmie bad ka rkhie
“Marchborn, Marchborn ale khun” la pyrta ka kmie
“Shaid” ia rkhie ki para jong u
“Ha … ha … ha” la rkhie pynbud sa u Marchborn uba ju khot tamsneng
“Mynta te da bamja ruh nga da sngew hun ba la ioh bam bang. Sngewphuhmut phuhmat ka dur ka dar ba ngi la kham bit kham biang. Ka saw shaka ha phyllaw ka don sa la shem snem sa ka kali iong-stem” ong ka para u Marchborn
“Ngi ki briew ngim ju sah kumjuh. Ka jingkylla ka don. Ka jingim briew ka don ka jingbakla hynrei haba la sngewthuh ba ka dei ka jingbakla ka don pat ka jingkylla hadien. Mynshuwa nga kthang ban kynmaw kato ka por hynrei mynta nga jaw ummat kmen ba ki jingkyrkhu jong u Trai Kynrad ki shlei ha iing jong ngi” ong u Marchborn [yn dang bteng]