DA PYNSHONGNIA

P.B.S

[ba bteng] “Biang shu hun noh hangta hi” ong u khun
“Ka dei khun” mynjur ka kmie
Kane ka aiom tlang ka dei ka por ba dawa bun ki jinglut jingsep namar ba bun ki kam sngewbha. Ha kiba kham don kham em ka dei ka por ban pyni ia ka jingriewspah jong ki lyngba ki riam ki beit ha ki kam ki lad ba bun jait. U Peter ha la ka kamra thiah u pyrkhat ba un khapbrip baroh ki jingkwah riam kwah beit hynrei u la kut jingmut ban pynlang shitom ban siew dep kloi ia ka ram ka shah u malik ynda u la ioh ia ka kali. U pynngeit ha la ka mynsiem ba ka jingnang ban im ka pynmyntoi shibun hadien habud. Kane ka jingsngewthuh jong u ka iai im hapoh jong u.
U Bah Bok u la pur khana ha la ka menkmie ia ka jinglong jong u Peter, uwei na u nongtrei jong u. U da iaroh shisha ia ka jinglong babha bad ka jinglong shisur jong u. U la bteng ban ong
“Lah niar shisha phi kmie ban lap ban shem kum uto u samla mynta. Jin da dei u la kyreit u sarong te nga ruh ngam lah shaniah than” pynpaw u menkpa
“Phi i kpa u samla briew ne ka samla briew kiba pyrkhat janai la ka lawei ki dei ban long kum u Peter. Namar haba kup ia ka jinglong babha ki jingkyrkhu kin tuid na diang na mon namar ba baroh ki lah ban buh ka jingshaniah” ong ka menkmie.

“Ka dei kaba phi ong” mynjur u menkpa
“Balei phim tyrwa jingiarap ei ei lada phi don lad ia uba pli? Sa kawei ruh ba un iaineh ban trei bad phi” tyrwa ai jingmut ka menkmie
“Ioh ki bishni kiwei pat?” ong u menkpa
“Balei kata ka thaw jingeh seh?” tynjuh ka menkmie ia ka bor pyrkhat rangbah jong u
“Kam thaw re tangba hap leh sian phi kmie” jubab u menkpa
“Ka kam jong phi ne ka kam jong ngi kan nym jynthut ne sepei wei haba ngi ioh u nongtrei uba trei hok, iathuh hok bad bym ju leh buit tuh. U nongtrei uba beit ha ka kam pisa uta u lah dei u briew uba lah ban shaniah. Ne phi ong kumno kpa” twad jingmut ka menkmie bad ai kwai artat ia u
“U nongtrei uba beit ha ka pisa te uba lah janai hi kein. Wat ia ka tulop jong u ruh hap pynheh ong” ong u menkpa.

“Ka dei palat” mynjur ka menkmie
“Ynda lah urlong ka kam ngan sa iathuh pat ha phi” ong kynsan u menkpa
“Balei ym long iathuh ia nga mynta, kpa?” kylli ka menkmie
“Da phi kwah iathuh te ngan iathuh kein. Hynrei nga shait tieng ba ki kynthei briew kim ju lah ban kun ne sngap shwa kum ma ngi ki Rangbah” kren khiathew u menkpa
“Ki shait ong kumta bad ka dei ruh kumta tangba don ho iwei ar ki longkmie kiba jar jar” ong ka kmie ki khun
“To, nga ngeit phin long kumta” ong u menkpa bad u wiat rymmuin
“Phi i kmie, nga don bha ka jingisynei ia u Peter. Ki daw ki bun. U dei u khun shynrang ba marwei i kong bad sa kawei ka para kynthei. Ka kmie ka la noh ka rta. U hap pynbit pynbiang ha iing ha sem. Ka iing jong ki ruh ka bym da bha than. U dei u khun u paralok jong nga uba la khlad noh mynshuwa uba kyrteng u Plan. Naduh ba khlad u kpa u la hap ban kit ban bah hi ia la ka iing wat ha ka rta kaba ym pat dei pura bha. Ka leit jia ha kawei ka janmiet haba nga wanphai na ka jingpeit jingtrei ba nga iakynduh ia u ha surok. Nga pynieng ka kali bad nga kren. Ynda lah kylli bha pleng u dei u khun u Plan. Ka mynsiem jong nga ka kyntu bad hadien shitaiew nga leit mih sha iing jong u ban iakynduh bad ka kmie. Haba nga tyrwa ban aikam katno ki kmen khamtam eh ba nga dei u paralok u kpa jong u. Haba u la treh ban wan bad haba nga peit ia ki rukom trei jong u ka pynkmen shisha ia nga. U la thied ka scooty rim bad da kane u wantrei man la sngi. U hun tang kumta hi da kane ka mar second hand. Da ka jingshaniah nga la pynbeit bad u ba ngan kyrshan ram ba un ioh noh da ka kali ba un khamsuk khamtam ha ka por tlang. Kumta kein kmie” pynkut u bah Bok.

“Nga hun jrut ka mynsiem kpa ba phi thmu ban leh kumta khamtam ia kiba duk ba jynjar” ai jingiaroh ka menkmie
“Phi pat sngap jar beit ho, ioh ka mih haei haei kiwei pat ki nongtrei kin sa ong kumno ia nga” bthah u menkpa
“Ngan iai ap haduh kata ka por kein” ong ka menkmie
“Shwa ka snem thymmai la ioh beit hi” kren pynthikna u menkpa
“Toi, ka jinglehbha ka dei hi ban paw shabar ba kiwei kin tip” bteng ka menkmie
“Em, phi nga te ngam sngew dei ai ba u Blei hi un tip ia kata ym na ki briew” pynshai u menkpa
“Uba ai nong ia ngi dei u Blei hi ym u briew. Un ai nong ha ki bun ki rukom” iai ban u menkpa
“Haba leh bha wat ju khmih lynti ia ka bainong hadien na ki briew hynrei uba najrong hi u ban kyrkhu bun shah namar ngi leh ia kaba bha” pynkut u menkpa [yn dang bteng]