DA PYNSHONGNIA

P.B.S

[ba bteng] U Peter u khie na kaba thiah bad u mih shabar ban peit ia ka jingitynnad ka mariang.
U Khun bynriew ia uba la bsiap da ka jingdon ka bor pyrkhat hateng-hateng u lyngngoh ia ka maian-blei kaba lah ban pynlong ia ka mariang kaba kup ha la ka khor ka khriam ha ka jingtyllun jong ka por. U Peter kum u rang-samla u sngewthuh ba dei kum ha kane ka por ba ki Thei bad ki Rang ki sngewtynnad ban shangkai sngewbha kylleng ka Ri-Khasi ban sakhi da ka khmat lajong ia ka jingitynnad jong ka mariang.Dei ruh halor kane ka bynta ba ki nongrwai ki thaw bad kynud ka jingrwai ban iaroh ia ka. La u briew u kwah ba kum kata ka por kan neh sah hynrei ka por kam ju ap iano-iano ruh.

U Peter u la khreh leit trei noh bad mar kumta hi ula mih da ka scooty rim. Une u samla u dei uba biang por bad uba bat por ym ju slem ban leit la ka kam. U Iathuh hok bad pynpaw beit hakhmat u malik ia kano kano ka jingsngew jong u. Kane ka la pynlong ia u bah Bok ba un shaniah bad ai tulop khamheh ia u. U malik uba ioh ia u nongtrei ba lah ban shaniah u kham suk ka mynsiem.
La iaid ki taiew bad la wan u bnai thymmai u ‘Naiwieng’. Ka miet ka la nang lyngngkot bad ka jingkhriat tlang ka la sdang ban paswut. Kiba niah ar shaka la ka dei ka bike ne ka scooty ki la sngew salia namar ba la khriat. U Peter hapoh la ka dohnud u pyrkhat ba u lah ne em ban ioh kali mynta u bnai tangba u khlem kylli ei ei na la u malik.

“Khun, ym pat ong ei ei i bah?” kylli ka kmie
“Em, phi mei” u iathuh
“To lah sngewbiang bha da ioh mynta namar ba lait khriat” ong ka kmie
“Hooid, kein nga ruh nga pyrkhat kumta” ong u Peter
“Tharai last week une u bnai” shu lait ong kynsan u Peter
“To ai ba kan long kumta” kren kitbok ka kmie
“Nga ruh nga shu don ka jingsngew kumta tangba kam lei-lei lada ym pat ioh ruh ngam da khuslai than. Bha kaba slem ban ia kaba duh” pynpaw u Peter
“Ieh katto phi lah shah ym slem shuh hi khun, lehse, hapoh une u snem” ong ka kmie
“Biang shu hun noh hangta hi”ong u khun.

“Ka dei khun” mynjur ka kmie
Kane ka aiom tlang ka dei ka por ba dawa bun ki jinglut jingsep namar ba bun ki kam sngewbha. Ha kiba kham don kham em ka dei ka por ban pyni ia ka jingriewspah jong ki lyngba ki riam ki beit ha ki kam ki lad ba bun jait. U Peter ha la ka kamra thiah u pyrkhat ba un khapbrip baroh ki jingkwah riam kwah beit hynrei u la kut jingmut ban pynlang shitom ban siew dep kloi ia ka ram ka shah u malik ynda u la ioh ia ka kali. U pynngeit ha la ka mynsiem ba ka jingnang ban im ka pynmyntoi shibun hadien habud. Kane ka jingsngewthuh jong u ka iai im hapoh jong u.

U Bah Bok u la pur khana ha la ka menkmie ia ka jinglong jong u Peter, uwei na u nongtrei jong u. U da iaroh shisha ia ka jinglong babha bad ka jinglong shisur jong u. U la bteng ban ong
“Lah niar shisha phi kmie ban lap ban shem kum uto u samla mynta. Jin da dei u la kyreit u sarong te nga ruh ngam lah shaniah than” pynpaw u menkpa
“Phi i kpa u samla briew ne ka samla briew kiba pyrkhat janai la ka lawei ki dei ban long kum u Peter. Namar haba kup ia ka jinglong babha ki jingkyrkhu kin tuid na diang na mon namar ba baroh ki lah ban buh ka jingshaniah” ong ka menkmie
“Ka dei kaba phi ong” mynjur u menkpa
“Balei phim tyrwa jingiarap ei ei lada phi don lad ia uba pli? Sa kawei ruh ba un iaineh ban trei bad phi” tyrwa ai jingmut ka menkmie
“Ioh ki bishni kiwei pat?” ong u menkpa
“Balei kata ka thaw jingeh seh?” tynjuh ka menkmie ia ka bor pyrkhat rangbah jong u
“Kam thaw re tangba hap leh sian phi kmie” jubab u menkpa
“Ka kam jong phi ne ka kam jong ngi kan nym jynthut ne sepei wei haba ngi ioh u nongtrei uba trei hok, iathuh hok bad bym ju leh buit tuh. U nongtrei uba beit ha ka kam pisa uta u lah dei u briew uba lah ban shaniah. Ne phi ong kumno kpa” twad jingmut ka menkmie bad ai kwai artat ia u
“U nongtrei uba beit ha ka pisa te uba lah janai hi kein. Wat ia ka tulop jong u ruh hap pynheh ong” ong u menkpa
“Ka dei palat” mynjur ka menkmie
“Ynda lah urlong ka kam ngan sa iathuh pat ha phi” ong kynsan u menkpa
“Balei ym long iathuh ia nga mynta, kpa?” kylli ka menkmie
“Da phi kwah iathuh te ngan iathuh kein. Hynrei nga shait tieng ba ki kynthei briew kim ju lah ban kun ne sngap shwa kum ma ngi ki Rangbah” kren khiathew u menkpa
“Ki shait ong kumta bad ka dei ruh kumta tangba don ho iwei ar ki longkmie kiba jar jar” ong ka kmie ki khun [yn dang bteng]