DA PYNSHONGNIA

P.B.S.

[ba bteng] “Nga ngeit i la pynsngewthuh bha ia phi khun bad kata ka jingong jong phi” pynpaw ka kmie
“Hooid, i la pynshai bha. Shiban ruh ka pynsuk ia nga bad sa shiban ruh ka pynsuk ia i malik, lehse i don ka plan kaba donkam eh kaba i la mang lypa” la ong u Peter.

“To ngin pdiang beit khun kumba kwah i bah bad kyrmen beit ia kaba bha” kren ai mynsiem ka kmie
“To ka biang mei nga hun haba phi la mynjur lang” pynpaw u Peter bad u ieng ban leit sum noh.

LYNNONG – 5
Ka kmie jong u tam sneng katba nang iaid ki sngi ka kham sting ki jingmut jingpyrkhat namar ka la hun ia ka jingiasyllok jong ki rangbah balang. Ka kyrmen beit ba ka jingbha kan wan pat ha ka iing jong ka. Watla u khun jong ka u don hapoh along khlem duh jingkyrmen ka ngiet ba un sa lait ha kawei ka sngi. Ki khun heh bad ba kham rit jong ka ruh ki pyntngen beit ia la ka kmie.

Ka jingim jong kane ka longiing ka iai tyllun ha ka jinglong duk nalor ba khia ka jingkit ha la u khun uba don hapdeng ka jingeh. Ka jingiaksaid ka long kaba jur ban pyndap pynbiang ia la ka iing hynrei ym ju don ka sngi pat ba kin thiah khlem jingbam. Ka kmie ka iai sneng ia la ki khun ba ki dei ban nang ban jied paralok bad ka da pynsngewthuh ha ki ba don ki khep ba ki briew ki shah shet ha la ki paralok
“Da husiar ho khun wat ju shah pynbiej hynrei dei b an da sian haba ia long paralok” sneng bad maham ka kmie ia la ki khun
“Lah sien hi mei lah heh te” ong u khun kham heh rta
“Nga ong khnang kumta kein ba phin sngewthuh” ong ka kmie da ka sur kaba sngew khia
La hapdeng kat kane ka jingshem hynrei kane ka longkmie ka don ha ka ka mynsiem ialeh ban pyndap pynbiang bad kumjuh ruh ban ialam ia la ka longiing ha ka lynti kaba dei ba kaei kaei kaba wan jia ha kane ka mynta kan nym jia shuh. Kane ka longkmie ka pdiang ba kaei kaba ka lah mad lypa mynta ka pynsted bad ai jinghikai ia ka ba kan nym shim sting ia la ki khun ha ki liang baroh. Ha kawei ka sngi katba u khun ba-ar jong ka uba shait khot ieit ha iing u Deng u la iakynduh bad uwei u khynnah uba la pep skul noh tang ha ka class IX. Uta u khynnah u la wer ia u ban leit tam ia ki bitor kyiad, plastic um khnang ban ioh kamai nangta. U la pynbor ia u Deng da ki ktien ba pnah ba thiang jong u khnang ba un ioh paralok. U Deng hapdeng kata ka jingbang nia uta u khynnah u shu lait ban ong ba un iathuh shwa ia la ka kmie.

“Long hap da iathuh ia ka kmie haba shu leh kumta ruh bad ka ioh pisa artat” ong uta u khynnah uba kyrteng Synshar
“Balei ym long ban iathuh ia i Mei ruh” pynphai ktien u Deng
“Long balei ym long hynrei nga shu ong kein” ong u Synshar
“Te lano men iathuh ia nga ba ka long?” buh jingkylli u Synshar
“Tharai sngi saitjain namar mynta arsngi nga hap pyndep ia ki kam sahteng ba pain nong ki briew” iathuh u Deng
“To ngin sa iakynduh syndon Sunday lada lap hangtei ha madan foorball” ong u Synshar bad u leit noh
Haba ka kmie ka la wan na ka jingbylla bad hadien ba la dep bam u Deng u iathuh ia la ka kmie ia kata ka jingkhot u Synshar ban leit tam tiar jot
“Hangno me iakynduh bad u?” buh jingkylli ka kmie
“Ba nga dang iaid lynti nga iohi ia u ba u dang tam ia ki bitor kyiad, plastic um ba la bret bad kiwei kiwei. Hamar hangta hi u la wan iakynduh bad nga” iathuh u Deng
“Ka mut u iawer lang ia me ban trei kumba u trei?” kylli bniah ka kmie
“Hooid u khroh ia nga ba kane ka kam ka biang bha namar don ka por ka por ba ioh pisa shibun” iathuh shuh shuh u Deng
“Phin shah Mei?” pan jingbit u Deng
“Ap ngan da pyrkhat shwa mynta mynta ngam pat rai” ong ka kmie bad ka sngap noh
U Deng haba leh ka kmie kumne u lah sngew artatien ioh ba kam shah, bad u sdang sa ban leh phoi. U pyrkhat ba ka jingkwah jong u kam nym poi shano shano ruh
Ka kmie jong u Deng ha la marwei ka pyrkhat ba kane ka kam tam tiar jot ka long kawei na ki kam kaba ioh pisa bad lada smat lei lei ban leit hiar shaduh thain nongkyndong yn kham ioh bun. Ha kawei pat ka liang ka pyrkhat ba u khun uba sdang ban khie samla yn trei kane ka kam lada u ioh pisa un ngat ha ki bun ki shang kawiah ka jingsniew. Haba ka la shim rai ha la ka mynsiem ba dei ban khang ia u Deng na kata ka kam da kaba pyrkhat ba ioh kan ngat sa kawei pat ka jingeh.

“Ar sngi hadien ynda ka la dep bamja ka phah khoh kwai ia u Deng bad ka kren syndon ia u
“Peit shane khun nga ngam pat kwah ba men trei kato ka kam katba nga dang lah ngan bylla shitom ban pyndap ia ka iing. Nga isynei ban phah trei ia kum kato ka kam” ong ka kmie [yn dang bteng]