DA PYNSHONGNIA

PBS

[ba bteng] U malik u dap da ka jingkmen ban iohi ba ki kam jong u ki iaid shaphrang. Ha kawei ka sngi ynda ki nongtrei ki la leit lut bad sah sa tang u Peter namar u malik u la ong lypa ba un ap ha kata ka sngi. U malik u la iakren bad u Peter kumne.

“Nga don kane kawei ka jingmut ban pynsngew bad ban tyrwa ha phi Peter, kata, ka long nga kwah ban kyrshan ia phi ba phin thied kali noh ban kham suk la ha phi ne ha ka kam jong nga” ong u malik
“Nga sngewieit sngew burom shibun eh ia kata ka jingtyrwa sbun jong phi bah. To, ngan ioh ktien shwa na i mei mo. Ka dei ka jinglong jong nga ba kano kano kaba ktah ia ka iing nga hap ban iasyllok bad i mei” u la ong.

“Ngan ong da kaba shai phi ai kat kaba phi sngewlah ia kaba duna nangta ngan sa tip hi ma nga. Ngan shu khate ia ka tulop jong phi khyndiat khyndiat man u bnai. Nga sngewieit bad sngewtynnad shibun eh ia phi Peter ba phi ieit eh bad burom eh ia la i mei bad ba phi hap ban da iathuh bad iasyllok shwa bad i shwa ba phin shim rai. Ka dei eh kane ka jingleh jong phi namar ba phi la shim ka jinglong rangbah ha iing ba i Pa jong phi im don shuh” kren iaroh bad ai mynsiem u malik.

Nga hap leh kumta phi malik namar nga don tang i mei bad kawei ka para kynthei bad ki la buh ka jingshaniah tang ha nga u rangbah. Lada biang ma nga ka mut ka lah biang bad tang shu bakla ma nga ka mut ki la bakla lut. Nga ieit eh ruh la ka iing nga iathuh hok ia phi malik” pynpaw u Peter
“Deh niar shisha ban lap u briew uba kum ma phi hynrei ban ha kine ki khynah mynta lei te la kiew syndon ka jingsarong. Iaineh ha kane ka jinglong jong phi bad u Blei un iarap ia phi” la sneng u malik
“To malik” ong u Peter ha ka sur kaba jem.

“To sa shu ai ktien pat phi ha nga mo ynda phi la iashongkai bad la i mei” ong u malik
“To, hooid” ong u Peter
Ka por ka la dap 7 baje mynmiet. U Peter u la leit phai noh sha la iing. Ka kmie bad ka para ki la lyngngoh ba u Peter u slem ban wan. Hamar ba ka kmie ka mut ban phone noh hynrei ki la lap iohsngew noh ia ka jingsawa ka scooty kaba ki la ngeit beit ba dei u khun.

“Hamar ba nga mut ban phone phi lah da wan noh” ong ka kmie
“Nga kham slem khyndiat namar ba nga donkam ha jingtrei” ong u Peter bad dang kam syndon ban rung sha ha iing
“Tiew shwa da ka sha phi Hep” la bthah u Peter
“To bah” ka ong
“Ngan pyntiew styndon ka umsum jong phi da la thnam kane ka umsha ba sepei kane ka shawla kaba meh hur-hur” ong ka para
“Ka dei kein ba sepei u rnga” ong u Peter.

“Kato ka jaket syaid iong ka la rkhiang em hep?” kylli u Peter
“Hooid, bah” ka la ong
Katba u Peter u dang dihsha u la pur khana ha la ka kmie ia ka jingiakren bad u malik
“U bah Bok u dei shisha u briew uba bha palat” la ong ka kmie
“I bha shisha phi Mei. Nga sngewthuh namar nga la trei katto snem” mynjur u Peter
“Te ngin shim rai kumno mei ha kaba iadei bad kata ka jingai jingmut jong i ban kyrshan thied kali ia nga” twad jingmut u khun.

“Nga ngeit i la pynsngewthuh bha ia phi khun bad kata ka jingong jong phi” pynpaw ka kmie
“Hooid, i la pynshai bha. Shiban ruh ka pynsuk ia nga bad sa shiban ruh ka pynsuk ia i malik, lehse i don ka plan kaba donkam eh kaba i la mang lypa” la ong u Peter
“To ngin pdiang beit khun kumba kwah i bah bad kyrmen beit ia kaba bha” kren ai mynsiem ka kmie
“To ka biang mei nga hun haba phi la mynjur lang” pynpaw u Peter bad u ieng ban leit sum noh.

LYNNONG – 5
Ka kmie jong u tam sneng katba nang iaid ki sngi ka kham sting ki jingmut jingpyrkhat namar ka la hun ia ka jingiasyllok jong ki rangbah balang. Ka kyrmen beit ba ka jingbha kan wan pat ha ka iing jong ka. Watla u khun jong ka u don hapoh along khlem duh jingkyrmen ka ngiet ba un sa lait ha kawei ka sngi. Ki khun heh bad ba kham rit jong ka ruh ki pyntngen beit ia la ka kmie.
Ka jingim jong kane ka longiing ka iai tyllun ha ka jinglong duk nalor ba khia ka jingkit ha la u khun uba don hapdeng ka jingeh. Ka jingiaksaid ka long kaba jur ban pyndap pynbiang ia la ka iing hynrei ym ju don ka sngi pat ba kin thiah khlem jingbam. Ka kmie ka iai sneng ia la ki khun ba ki dei ban nang ban jied paralok bad ka da pynsngewthuh ha ki ba don ki khep ba ki briew ki shah shet ha la ki paralok [yn dang bteng]