DA PYNSHONGNIA

P.B.S

“Phi wan naei khun la katta miet?” la buh jingkylli ka kmie kaba dang pule kotbah ha kamra thiah
“Shu wan donkam bad uwei u paralok phi mei” la jubab u khun da ka ktien kaba jem.

“To khie leit bamja shwa” la ong ka kmie
“Une u khynnah ngan hap tohkit bha lashai namar ba u la mlien ka shangmiet kumne khlem da tip kaei ka kam kaba u leh” la ong ka kmie ha la poh mynsiem bad ka dang iai pule sa shiphang ia ka kotbah
“Mei phin bam une u soh apple ngan pynkhoh” la kylli ka khun kynthei
“To khoh khoh, khun” la mynjur ka kmie
Ka para ka shu peit ia ka jingleh bunkam u hynmen shane shatai i kumba um kwah ban iashongkai lang. Ka kmie ka shu sngap bad ka buh jingmut ban iasyllok bad la u khun ha kawei ka sngi.
Ka kmie bad la ka khun kynthei ki la iabam soh lang ha kamra shetja. U khun shynrang pat u muja ka peit sport ha kamra pdeng. Ka kmie bad la ka khun ki ia myllen ka iathuh khana ia kane katai. Katba ki dang ia myllen ka iathuh khana kumno re kumno ka khun kynthei jong ka ka poi iathuh khana ia uwei u khynnah shynrang dang ha ka rta kumba 19 snem ba u la m ad ia ki kynja jingdih ba shyrkhei. Kata ka jingiohsngew jong ka na la ka khun ka la pynieng shkor ia ka. Ka kylli bniah bha na la ka khun.

“Pha tip thikna?” kylli ka kmie
“Ngam bakla phi mei ba la iathuh da ki briew kiba ithuh bad tip bha”
“Ah! ka pyrthei aiu kum kane” la kren bynniaw ka kmie
“Balei phi ong kumta mei?” kylli ka khun
“Yn ong shuh kumno haba la ker tawiar tang ki jingsniew suda. Ym i don jingkyrmen shuh ia ka pateng ka ban wan” ong ka kmie bad ka leh khia jingmut
“To phi mei ynnai khuslai than” kren ai mynsiem ka khun
“Shim bam pynlut noh phi uto shi slais” ong ka khun
“Ai hangne” ong ka kmie
“Theh mei” ai ka khun ha u bol rit rong saw
Haba dep bam soh ka kmie ka leit sha kamra ba don u khun shynrang. Une kynjai ha ka peit sport football bad ka peit mobai artat
“Mem pat thiah khun” ong ka kmie
“Em phi dang katta ruh” u peit baje syndon na mobai
“Balei phi wit ne ba nga pynheh volume” u kylli na ka kmie
“Em, nga shu ong kein” ong ka kmie bad ka rung noh sha la kamra thiah
Ka khun kynthei ruh ka la leit thiah noh sha la kamra. Ka por ka la nang iaid bad ka por ka dap artat 11:30 mynmiet. U khun shynrang u ieng ban pynlip noh ia ka Tv bad pynlip syndon ia ka light. U rung sha la kamra thiah. Jar la kynjah ba la pynlip ia ka Tv.

Ka step lyiur ka la wan ha ryngkat ka jingdum slap. Ka kmie bad ka khun ki la khie bad iadihsha lang. U khun shynrang u dang ha jingkynoi ka jingiohthiah.
“Mei, ong ha i Bah seh ban nym leh tatoo ha tyrpeng ba ima bad ba i kamkai” ong bad kren rit sur ka khun
“Oh! u leh kumta seh!” leh kyndit ka kmie
“Phim iohi seh?” ong ka khun
“Em, nga khlem kynmaw peit” jubab ka kmie [yn dang bteng]