“Da phi khang ia ka dukan, khang lang ia nga” ong ka Prodipta

Shillong, 13 Naiwieng:
Khyndiat bnai myn shuwa ki Enforcement ka Khasi Hills Autonomous District Council (KHADC), ki la leit ban khang ia kawei ka dukan ha Laban kaba ki la lap ba ka dei ka dukan jong uwei u bar jylla u bym don Laisen khaii, hynrei haba ki la poi ha katei ka dukan la kam trai pynban da kawei ka briew kaba la tip kyrteng kum ka Prodipta Khongwir bad haba ki la mut ban khang ka la pyneh bad ka la kam ba ka dei ka Khasi, bad ka ong ba kam donkam ban ialeh laisen khaii.
Ha katei ka por ki pulit Enforcement ka KHADC, ki la khang beit ia katei ka dukan bad ki iaid la ka jong ka kam, hynrei hadien ba katei ka briew ka la kiew ing lieh ingsaw, la ai bor ba kan plie biang ia ka dukan ban sei ia ki mar bad la buh da ka por.
Dei hadien ba la kut katei ka por ba la buh bad hadien ba la ioh hukum na ki bor ba halor ba dei ban khang noh ia katei ka dukan, mynhynnin ka sngi ka 12 tarik U Naiwieng ki pulit KHADC ki la leit kyrpang sha Laban ban khang ia katei ka dukan jong ka Prodipta Khongwir. Hynrei haba la poi ha katei ka dukan ka Prodipta ka pyneh jubor ia ki pulit KHADC bad kam shym la shah ba kin khang ia ka dukan bad kam mih hi tdot na dukan bad ka da ong ruh “Lada khang ia ka dukan, khang lang ianga shapoh”.
La iathuh ba ki Enforcement kim nud ban ktah kti ban sei jubor ia ka shabar, sa kawei ruh namar ba ka dei ka riew kynthei, katei ka jingleh ka Prodipta ka la pynlong ia ki Enforcement ban ujor sha ki pulit ka Laban PS bad kham hadien kata, ki pulit ka Laban ryngkat ki pulit kynthei ki la wan poi sha katei ka jaka bad ki la sei ia ka shabar bad ki pulit KHADC ki sa ioh ban khang ia ka dukan jong ka. Ki pulit kim shym la kem ia ka Prodipta hynrei ki la shu sei ia ka shabar ka dukan.
Lah ban pynkynmaw ba ha ka por ba ka KHADC ka la leit ban khang ia ka dukan ka Prodipta Khongwir ka bym don Trading License , ka la kam ialade ba ka dei na Siatbakon, thain Pynursla hynrei na ka liang u Rangbah Shnong katei ka shnong u la kyntait ba ka dei na katei ka shnong da kaba u ong ruh ba ym ju don kum katei ka kyrteng ha ka bui jong ka shnong.