Da ki spah ngut poi ki nongniah kali, sha ka jingshong kyllaiñ myngngor mynta ka sngi

Shillong: Mynta ka sngi ka 9 tarik u Kyllalyngkot 2021, da ki spah ngut ki nongniah kali kamai ki la shong kyllaiñ myngngor ha madan Malki naduh ka por 1 baje nohphaisngi hapoh ka jingialam jong ka Meghalaya Joint Action Committee of Commercial Vehicle(MJACCV) .

Ha kane ka jingiashong kyllaiñ myngngor, la iohi da ki spah ngut ki nongniah kali ha ryngkat ka jingiasynran lang da ki kynhun bapher bapher ki la wan ha kane ka jingiakhih kaba jai jai.

Haba kren sha ki lad pathai khubor, u Chairman jong ka MJACCV, u Bah Wandonbok Jyrwa u la ong ba kane ka jingshong kyllaiñ myngngor ka jong ki ka la sdang naduh ka por 1 baje nohphaisngi bad kan kut haduh ka por 4 baje janmiet bad ia ka meeting yn pynlong ha ka por 3 baje janmiet.

Na ka liang jong u ne u Chairman, u la khublei ruh ia baroh ki ba la poi ha kane ka sngi kiba la wan na kylleng kylleng ka jaka kiba na sor bad na khapsor ban pyni ba kim hun satia ia ka jingsngap mynthi jong ka Sorkar ban shu pynhiar tang da 2 tyngka ha kaba iadei bad ka petrol bad diesel.