Da ki spah ieng lain, ha ing u bah Hek

Shillong, 21 Naiwieng:
U myntri barim ka sorkar jylla u bah A.L Hek uba la bat teng ruh ia ka tnad ka koit ka khiah, u la ujor pyrshah ia kito ki briew kiba la pynsaphriang ia ki khubor hamsaia ba u sam pisa T.5000 tyngka sha uwei u briew uba dei napoh konstitwensi bad nabar konstitwensi ruh. U bah Hek MLA ka seng Congress na Pynthorumkhrah u la ong ba katei ka dei ka khubor ka bym shisha. U la ujor sha u Superitendent of Police East Khasi Hills u bah M.Kharkrang bad ha katei ka jing ujor, u la ong “Nga wan ban pyntip sha phi, ba ka la don ka jingpynher sted ia ka khubor hamsaia da ki briew kiba ym lah ban tip, ban ong ba nga sam pisa T.5000 tyngka sha uwei u briew, ym tang ia ki briew kiba napoh konstitwesni jong nga hynrei ia kiba nabar jong ka konstitwensi ruh kum juh”.
Shuh shuh ha katei ka ejahar, u la ong ba katei ka hamsaia ka la pynlong ia ki spah ngut ki briew ban wan ieng laiñ ha ingsah jong u naduh dang step haduh ban da miet bad ki briew ki wan ieng lain ruh ha ophis treikam jong u bad katei ka pynthud ia ka kam jong u bad u la ong ba ka la mih ruh ka jingsngewthuh bakla hapdeng kitei ki paidbah. U bah Hek u la ong ba ki briew kiba la wan sha ingsah jong u ban ieng laiñ kim duna shuh ia ka 700 ngut eiei. U la suba ba katei ka lah ban dei ka kam jong ki seng sainpyrthei ban pynthoh bria ia u hakhmat ki paidbah. U la kyntu ia ki pulit ba kin tohkit mardor ia katei ka kam ban lap mano ba donkti ba npynsaphriang ia katei ka khubor lamler.