Da ki spah bilor, kurup kyiad ki dkhot VDP New Nongstoiñ

Nongstoiñ, 21 Iaiong:
Ha ka janmiet jong ka sngi thohdieng, katba ki dkhot jong ka VDP New Nongstoiñ, ki dang bteng ia ka jingkhynra ia ki nongkhaii kyiad beain hapoh Iew Nongstoiñ, ki la ioh ruh ban kurop da ki spah bilor ka kyiad phareng na kawei ka jaka kaba don hapoh jong ka Iew Nongstoiñ.
Ym tang kata ki dkhot jong ka VDP nalor ka kyiad, ki la ioh ruh ban kurup ia u kynja bad ia ki kot khalai na katei ka jaka katba ia ki briew pat yn shymla lah shuh ban lap dien namar ba ki la ioh lad ban phet krad noh na katei ka jaka mar ia ioh ia ka jingtip ba ki dkhot jong ka VDP ki la pynlong ia ka jingkhynra.
“Ka jingkhaii kyiad beain da kito ki briew kiba ju ieng kyllum kyllum ban die kyiad hapoh jong ka jingkieng Nonbah bad kumjuh ruh da ki katto katne ki nongniah taksi kamai kiba pyndomkam ia ka kali jong ki tang ban khaii kyiad beain ka long ka jingpynjah burom ym tang ia ka shnong hynrei ia ka thain hi baroh kawei bad ngi maham tyngeh ruh ia kiba kum kitei ki jaitbriew bad kumjuh ia ki briew kiba nabar kiba ju mlien ban wan die bad khaiikyiad beain hapoh u pud u sam jong ka shnong” ong u wei na ki dkhot jong ka VDP New Nongstoin da kaba u la bynrap ruh ba nangne shakhmat kitei ki briew kim dei shuh ban dang iai bteng ban khaii beain ia ki jingdih pynbuaid bad lada dang lap yn pynshitom da kaba kham tyngeh bad ruh katba shong ka ain. Ha kawei pat ka bynta na ka liang jong ki nongialam ka VDP New Nongstoin, ki la kyrpad ruh ia ka ophis jong u Syiem ka Hima Nongstoiñ ba ka dei ban pynbiang noh ia ki bording ilektrik hapoh jong ka iew namar ba kiba bun ki briew ki ju leh ia ki kam sniew ha katei ka iew da kaba shim kabu ia ka jingdum.