Da ki phew lak, shah lute ka dukan die mobile ha Motphran; ym treikam ka CCTV ba la buh da ka sorkar

Shillong:Ha kawei ka jingjia shah lute, kaba la jia ha Motphran ha ka dukan die mobile Tech Spark kaba la long trai da u Bah Ribel Pariat bad la suba ba kane ka jia ha ka por 3 ne 4 baje, myn hynnin dang step phyrngap kaba ka jingshah lute ka la palat ïa ka 20 lak.

Haba ïakren bad u Bah Ribel Pariat, u la ïathuh ba kine ki mobile kiba la shah tuh ki dei beit na ki Kompeni ba remdor kiba kynthup kum ka Samsung, Techno bad kiwei de. U la ïathuh ruh ba kine ki nongtuh ki la rong beit thik tang ïa ka mobile katba u charge bad ka synduk song pat kim shem la rong satia.

Haba pyrshang ban kylli, ïa ka por ba ki ïoh ïa ka jingtiphalor kane ka jingjia u Bah Ribel Pariat u la ïathuh ba la ïoh jingtip ynda ki la wan plie ïa ka dukan ha ka por 8:30 mynstep eiei da ki pyrsa bad ki khun jong u. “Hadien ba ki la lap ba ka tala ka la shah pynpait na ka liang jong ki ki ki la phone ïa nga bad marmar hi nga leit ban plie bad ynda ngi lap ïa kaei kaba la jia na ka liang jong ngi ngi la ai jingtip mardor sha ki pulit” ong u Bah Ribel.

Shuh shuh u la ïathuh ba na ka liang jong ki, kim shem la rung satia shapoh dukan tad haduh ba ki pulit jong ka Crime Scene Units bad ka forensic team ki poi ban lum ïa ki nongmuna ba sah ha kane ka jaka.
Haba la pyrshang ban kylli pat la ki buh ne em ïa ki kor CCTV ha ka dukan jong ki na ka liang jong u u la ïathuh ba ha ka jingshisha la pyndait ïa ki kor CCTV tangba kine ki nonglute ki rah lut ïa ki kor kiba ka CCTV ka kunai (save) ïa ki dur bad ki video ne footage. Shuh shuh u la ïathuh ruh ba katba ka CCTV kiba la buh da sorkar ha ki bynta ka Motphran kim treikam satia namar baroh kiba la sniew suda.

Haba pyrshang ban peit pat ïa ka CCTV kaba don marsyndah kane ka dukan la ïohi ba hynnin ka step phyrngap la don uwei u samla briew ba hapoh ka rta 35 snem uba la pyrshang ban pynpait ïa kawei ka CCTV kaba don ha kane ka jaka bad na ka liang ki trai dukan ki la suba ba u lah ban dei uwei napdeng ki nonglute.
Haba ïadei bad kane ka jingshah tuh na ka liang u Bah Ribel u la pynpaw ruh ba ha ka jingshisha ka dukan jong u, ka dei kaba don ha ki bynta ba shngaiñ bha, namar ka dei ha khmat tam ïa ki dukan baroh bad ba ki pulit ruh ki ju ap pahara sha kito ki thaiñ bad kane ka jingshah lute hi lah ban ong ba ki dukan kiba kham sha kyndong lei kim don jingshngaiñ satia pynpaw u Bah Ribel.